9 may kuni Qashqadaryo viloyatining Yakkabog‘ tumanida e’tiborli holat yuz berdi. “O‘zbek Tayson” nomi bilan tanilgan MMA jangchisi Jasurbek Jo‘rayev yo‘l-patrul xizmati xodimining to‘xtash ishorasiga bo‘ysunmay harakatlangani sababli muammoga duch keldi.
Viloyat Yo‘l harakati xavfsizligi boshqarmasi ma’lumotiga ko‘ra, sportchi boshqaruvida bo‘lgan Kia Sonet qisqa vaqt ichida aniqlanib, tegishli choralar asosida to‘xtatilgan. Shundan so‘ng haydovchidan nega YPX xodimi talabiga amal qilmagani so‘ralgan.
Ma’lum bo‘lishicha, Jasurbek Jo‘rayev hali haydovchilik guvohnomasiga ega emasligini tan olgan. Shu sababli unga nisbatan ma’muriy bayonnoma rasmiylashtirilib, avtomobil jarima maydonchasiga joylashtirilgan.
Jangchi ushbu holat yuzasidan o‘z fikrini bildirib, yaqin orada haydovchilik guvohnomasini olishni rejalashtirayotganini aytdi. Uning ta’kidlashicha, so‘nggi paytlarda mashg‘ulotlar va sport faoliyati sabab bu masalaga vaqt ajrata olmagan.
“Yaqinda ‘prava’ olaman. Hozir mashg‘ulotlar bilan bandman, ulgurmayapman. Qonun hamma uchun bir xil. Qilgan ishimdan pushaymonman, buni hech kimga tavsiya qilmayman”, — deya izoh bergan u.
Mazkur holat yana bir bor yo‘l harakati qoidalariga rioya qilish, ayniqsa hujjatlarsiz transport vositasini boshqarmaslik qanchalik muhim ekanini eslatadi. Qonun oldida hamma teng ekani esa bunday vaziyatlarda yaqqol namoyon bo‘lmoqda.
“Zamin”ni Telegramʻda oʻqing!
