08:50 / 21.08.2020
612

Cifati kafolatlanmagan dori vositalarining noqonuniy aylanmasiga chek qo‘yildi

Cifati kafolatlanmagan dori vositalarining noqonuniy aylanmasiga chek qo‘yildi
Sifatsiz dori-darmon va farmatsevtika mahsulotlari salomatlikka jiddiy xavf tug‘dirishi shubhasiz. Chunki, turli sharoitda va belgilangan me’yorlarga rioya qilinmagan holda tashiladigan dori vositalari shifo o‘rniga kasallikni yanada kuchaytirib yuborishi mumkin. Afsuski, ayrim kimsalarni yurtdoshlarimizning salomatligidan ko‘ra, mo‘may daromad ko‘proq qiziqtiradi.

Toshkent viloyati bojxona boshqarmasi “Navoiy” chegara bojxona postiga qo‘shni davlatdan kirib kelgan fuqaro G.A. boshqaruvidagi “DAF” rusumli avtotransport vositasi o‘rnatilgan tartibda bojxona ko‘rigidan o‘tkazildi.

Natijada, avtomashinaning kabina qismida hech qanday hujjatlari bo‘lmagan qiymati 22,5 million so‘mlik, 16 quti “Altevir”, 10 quti “Diferelin” va boshqa turdagi dori vositalari borligi ma’lum bo‘ldi.

Yana bir holatda “S.Najimov” chegara bojxona postida fuqaro Sh.Sh. boshqaruvidagi “DAF” rusumli avtotransport vositasi bojxona nazoratidan o‘tkazildi.

Tekshiruv davomida, avtomashina kabinasining tom qismida umumiy qiymati 107,6 million so‘mlik, 36 dona quti “Kleksan 4000”, 400 dona qutida “Lianhua Qingwen Jiaonang” va 10 dona qutida “Arximaks 1000mg” nomli dori vositalari yashirilganligi aniqlandi.

Issiq ob-havo sharoitida saqlash va tashish qoidalariga rioya qilmagan holda yurtimizga olib kirishga urinilayotgan bu kabi dorilarning sifatiga kim kafolat bera oladi?
Hozirda mazkur holatlar yuzasidan bojxona organlari tomonidan surishtiruv harakatlari davom ettirilmoqda.
Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)