«Bu yerda 3ta opa turibdi. Nima qilay? Yo‘qot!» yoxud Prokuratura xodimining suhbati ekanligi aytilgan audioyozuv bo‘yicha bayonot

Ijtimoiy tarmoqlarda go‘yoki Farg‘ona viloyat prokuraturasi xodimining suhbati sifatida yozib olingan audioyozuv tarqaldi. U ikki kishining telefondagi suhbati bo‘lib, unda shunday gaplar bor.

«- Assalomu alaykum, Komilovman!
- Muhriddin aka?

- Ha.
- Mana bu yerda 3ta opa turibdi-da. Nima qilay?

- Yo‘qot, gaplashildi, yo‘qot!
- Bular ketmayapti.

- Nima deyapti?
- Mana shu yerda hozir viloyat prokurorini ushlaymiz deyapti. Ketinglar desam ham yo‘q deyapti», deyiladi telefon suhbatida.

Ushbu audioyozuv yuzasidan Farg‘ona viloyat prokuraturasi rasmiy bayonot berdi. Unga ko‘ra, audioyozuv viloyat prokuraturasi binosiga biriktirilgan qo‘riqlash xizmati xodimlarining o‘zaro suhbati qayd qilingan bo‘lib, ushbu jarayonda prokuratura xodimlari ishtirok etmagan.

Hozirda Milliy gvardiya Farg‘ona viloyati Qo‘riqlash boshqarmasi tomonidan xizmat tekshiruvi o‘tkazilmoqda.

Farg‘ona viloyat prokuraturasida fuqarolarning qabuli O‘zbekiston Respublikasining «Jismoniy va yuridik shaxslarning murojaatlari to‘g‘risida» Qonuni talablari asosida yo‘lga qo‘yilganligi ma’lum qilingan. “Zamin” yangiliklarini “Youtube”da kuzatib boring