Ariana Grande: musiqa mening jonim, kino esa yangi imkoniyat

Amerikalik mashhur qo‘shiqchi va aktrisa Ariana Grande o‘zining sodiq muxlislariga yana bir bor ishonch bildirdi — u kino sohasidagi faoliyatini kengaytirayotgan bo‘lsa-da, musiqa olamidan butunlay voz kechmaydi. Bu haqda u ijtimoiy tarmoqlardagi sahifalari orqali ma’lum qildi.

2024 yilda “Eternal Sunshine” nomli yangi albomini chiqargan Ariana hozircha uni jonli ijro qilmagan. Uning so‘nggi konsert safari 2019 yilda bo‘lib o‘tgan “Sweetener World Tour” edi. Shunga qaramay, u muxlislari uchun xushxabar qoldirdi:
“Kelasi yil sizlar uchun kuylash rejam bor. Hatto qisqa muddat bo‘lsa ham,” — deb yozdi u.

Yaqinda Cynthia Erivo bilan “Wicked” filmida bosh rolni ijro etgan Ariana, endi doktor Seussning mashhur bolalar kitobi asosida suratga olinayotgan “Oh, The Places You'll Go!” filmida ham ishtirok etishini e’lon qildi.

Shunga qaramay, u musiqa faoliyatini to‘xtatmasligini ochiq aytdi:
“Kuylash va musiqa har doim men uchun hayot manbai bo‘lgan. Har ikkisi uchun ham joy topilishi kerak,” — dedi u.

Grande turli loyihalarni yuritish bilan birga, musiqa faoliyati avvalgidek ko‘rinmasligi mumkinligini aytdi, biroq u bu o‘zgarishni quvonch bilan qabul qilmoqda:
“O‘zim xohlagancha ijod qilayotganimdan juda minnatdorman. Yaxshi ko‘rgan loyihalarim va orzularim o‘rtasida muvozanat topish men uchun muhim.”

Muxlislari esa ushbu yangiliklarga turlicha munosabat bildirdi. Masalan, superfanning biri — 23 yoshli Michael Rodrigues De Jesus — Ariana turga chiqishi mumkinligini o‘qib “ich-ichidan baqirganini” tan oldi. Uning fikricha, agar u konsert rejasini boshlasa ham, bu kichik hajmli tur bo‘lishi mumkin va bu ayrim muxlislarni norozi qiladi.

“Internetda ayrim odamlar uni kino bilan band bo‘layotgani uchun ranjiyotganini ko‘rdim,” — deydi Michael. “Menda ham bir vaqtlar shubha bo‘lgan: yana tur bo‘ladimi? U aktyorlikni tanlayaptimi? Agar u musiqa qilmasa, men kim bo‘laman?”

Shunga qaramay, u yakunda bunday fikrlar yo‘qligini aytadi:
“Sevimli artistingiz bir nechta sohada ijod qilayotganini ko‘rish juda hayajonli. Bu orqali uning iste’dodini yana ko‘proq jihatdan his qilasiz.”

Ariana Grande hozirda musiqa, kino va go‘zallik biznesini birgalikda muvaffaqiyatli olib bormoqda. U endilikda o‘ziga mos uslubda ishlashni tanlagan va ijodini yanada yuqori bosqichga olib chiqmoqda.

“Zamin”ni Telegramʻda oʻqing!