Toshkent shahri — Markaziy Osiyoning yirik ilmiy, iqtisodiy va madaniy markazlaridan biri sifatida nafaqat zamonaviy infratuzilmasi va tarixiy obidalari, balki turli rang-barang madaniy tadbirlari bilan ham sayyohlar e’tiborini tortayotgan shahardir. Har yili poytaxtda turli ko‘rgazmalar, festivallar va konsertlar o‘tkaziladi, ular nafaqat mahalliy aholi, balki chet ellik mehmonlar uchun ham katta bayramga aylanadi.
2025 yil 6 sentyabr kuni poytaxt madaniy hayotida yana bir muhim sana sifatida tarixda qoladi. Shu kuni Alisher Navoiy nomidagi O‘zbekiston Davlat akademik katta teatri oldidagi maydonda 96-teatr mavsumining ochilishiga bag‘ishlangan «Ad astra» («Yulduzlar sari») nomli ochiq osmon ostidagi konsert bo‘lib o‘tadi. Turizm qo‘mitasi axborot xizmatiga ko‘ra, ushbu tadbir nafaqat teatr ixlosmandlari, balki Toshkentga tashrif buyurgan sayyohlar uchun ham esda qolarli voqeaga aylanishi kutilmoqda.
Maxsus tayyorlangan simfonik orkestr bu kechada mashhur klassik asarlar va opera shedevrlari jonli ijro etadi. Musiqachilarning mahoratli chiqishi, ochiq havodagi o‘ziga xos muhit va nurli sahna jihozlari tomoshabinlarga haqiqiy madaniy bayram hissini ulashadi.
“Zamin”ni Telegramʻda oʻqing!
