O‘zining qalbga yaqin lirik qo‘shiqlari va raqsga chorlovchi kompozitsiyalari bilan muxlislar qalbini zabt etgan o‘zbek estradasining yorqin va mashhur namoyandalaridan biri — Jasur Umirov shaxsiy hayotida muhim voqea bilan bo‘lishdi. Xonanda ijtimoiy tarmoqlarda qo‘ygan suratlari orqali ikkinchi marta otalik baxtiga sazovor bo‘lganini ma’lum qildi. Umirov bu safar qizaloqning dunyoga kelishidan shodligini aytib o‘tdi.
Jasur Umirov samimiy so‘zlar bilan o‘z tuyg‘ularini ifoda etdi:
«Yaxshidan ham yaxshi kunlaring ko‘p bo‘lsin deyishadi-ku! Ana o‘sha kunlar shu bo‘lsa kerak», — deya yozib qoldirdi xonanda.
Uning bu xursandchiligi ijtimoiy tarmoqlarda keng yoyildi. Muxlislar va hamkasblar unga samimiy tabriklar yo‘llab, yangi tug‘ilgan farzandiga bardavom sog‘lik va saodat tilashdi.
