Jahon kinoindustriyasida o‘z izini qoldirgan “Kalmar o‘yini” seriali ortidan uning yulduzlari yana ekranlarga qaytdi. Bu safar ular Netflix'da namoyish etilgan “Beshiktebratar” (“Mantis”) filmi bilan tomoshabinlar diqqat markaziga tushdi.
Film 2025 yil 26 sentyabrda platformada taqdim etildi va qisqa vaqt ichida butun dunyoda katta shov-shuvga sabab bo‘ldi. Atigi bir hafta ichida uni 7 milliondan ortiq kishi tomosha qilgan, umumiy ko‘rish vaqti esa 13,2 million soatga yetgan. Bu ko‘rsatkich filmni Netflix'ning eng ko‘p ko‘rilgan uchta filmi qatoriga kiritdi.
Tanish chehralar va yangi sinov
Kartinaning bosh rollarini “Kalmar o‘yini” orqali millionlab muxlislar orttirgan aktyorlar — Im Shi Van (333-raqamli o‘yinchi) va Pak Gyu Yong (Kan Noil) ijro etgan. Ular ishtirok etgan “Beshiktebratar” nafaqat Janubiy Koreya, balki Vetnam, Tayvan va Tailandda ham Netflix reytinglarida birinchi o‘rinni egalladi.
Filmdagi voqealar yollanma qotillar hayoti atrofida kechadi. Asar markazida Li Hanul ismli tajribali qotil turibdi, u “Beshiktebratar” laqabi bilan mashhur. U xizmat qilgan yirik agentlik rahbari vafot etgach, yangi ish tanlash imkoniyatiga ega bo‘ladi. Ammo u o‘z yo‘lini o‘zgartirib, bolalikdagi dugonasiga yordam berishni afzal ko‘radi — bu qaror uni butunlay boshqa sinovlar oldida qoldiradi.
Im Shi Van ushbu rol orqali nafaqat dramatik, balki psixologik jihatdan ham murakkab qahramon obrazini yaratgan. Uning ijrosi tomoshabinlar tomonidan yuqori baholandi va ko‘pchilik uni “Kalmar o‘yini”dagi roldan ham kuchli deb atadi.
Tasvir va ijod jamoasi
Film rejissyori — mashhur koreys suratga oluvchi Li Te Sung. Ssenariy muallifi esa tajribali yozuvchi Byun Sung Hyun bo‘lib, u so‘nggi yillardagi bir nechta triller va dramalar bilan nom qozongan. Shuningdek, filmda janr ustalaridan biri — aktyor Cho U Jin ham ishtirok etgan.
Tanqidchilar fikricha, “Beshiktebratar” koreys kinematografiyasida yangi bosqich bo‘lishi mumkin. Unda jinoyat va drama elementlari mukammal uyg‘unlashgan, vizual ta’sir va saundtreklar esa filmga xalqaro darajada shiddat va hissiyot bag‘ishlagan.
Tomoshabinlar va muhokamalar
Ijtimoiy tarmoqlarda film haqidagi fikrlar to‘lqin kabi tarqalmoqda. Ko‘pchilik uni “Netflix'dagi yangi sensatsiya” deb atadi. Aynan “Kalmar o‘yini” yulduzlarining qayta ekranlarga chiqishi ham muxlislar uchun katta voqea bo‘ldi.
Filmning muvaffaqiyati Koreya kinematografiyasining dunyodagi nufuzini yanada oshirmoqda. Netflix so‘nggi yillarda aynan koreys triller va drama janrlariga katta e’tibor qaratayotgani sir emas — “Beshiktebratar” esa bu yo‘nalishning yangi namunasi sifatida baholanmoqda.
“Zamin”ni Telegramʻda oʻqing!
