O'zbekiston estrada yulduzi Rayhon shaxsiy hayoti va ijodi atrofida tarqalgan turli mish mishlar hamda tanqidlarga nisbatan o'z munosabatini bildirdi. Xonanda ijtimoiy tarmoqlarda o'zi haqida yoziladigan noo'rin gaplar, xususan, qizini yerto'lada saqlashi haqidagi asossiz iddaolar uni qanchalik ranjitishini yashirmadi.
Rayhonning ta'kidlashicha, u tanqidiy fikrlarni juda og'ir qabul qiladi. Hatto yuzlab ijobiy izohlar orasida bitta salbiy fikrga ko'zi tushsa ham, uzoq vaqt tushkunlikka tushib qoladi. Xonanda o'z faoliyati davomida duch kelgan ayrim noxush vaziyatlarni eslab, matbuotda uning konsert chiptalari sotilmayotgani va ijodiy inqirozga yuz tutgani haqida yozilgan maqolalar uni qattiq xafa qilganini aytdi. Bunday asossiz xabarlar sababli u hatto ayrim nashrlarni kuzatishni to'xtatishga majbur bo'lgan.
San'atkor o'zining birinchi turmushi hamda DJ Piligrim bilan bog'liq bo'lgan shov-shuvli mojarolar haqida ham to'xtalib o'tdi. Uning so'zlariga ko'ra, omma oldida yashash va doimiy kuzatuv ostida bo'lish oson emas, ayniqsa, shaxsiy hayotga oid yolg'on ma'lumotlar tarqalishi inson ruhiyatiga salbiy ta'sir ko'rsatadi. Rayhon muxlislarini har qanday xabarga ko'r-ko'rona ishonmaslikka va san'atkorlarning shaxsiy chegaralarini hurmat qilishga chaqirdi.
