Netflix platformasi bahor faslining ilk oyida kinomuxlislar uchun ajoyib yangilik bilan chiqdi. Alan Richson bosh rolni ijro etgan Harbiy mashina nomli fantastik jangari film o'zining qiziqarli syujeti va yuqori sifati bilan e'tiborni tortmoqda. IMDb reytingida 6.8 ball to'plagan ushbu kartina harbiy harakatlar, ilmiy fantastika hamda noma'lum texnologik tahdid uyg'unligini o'zida mujassam etgan. Bu haqda ixbt.com xabar beradi.
Film voqealari AQSH armiyasida xizmat qiluvchi ikki aka-uka atrofida kechadi. Topshiriq vaqtida bo'linma o'qqa tutilgach, faqat 81 taxallusli bosh qahramon tirik qoladi. U marhum akasiga bergan va'dasini bajarish uchun elita reynjerlar maktabiga yo'l oladi. Biroq mashg'ulotlarning so'nggi bosqichida askarlar kutilmaganda kosmosdan kelgan sirli robotlashgan mavjudot bilan to'qnash kelishadi.
Dastlab askarlar bu holatni oddiy o'quv mashg'uloti deb o'ylashadi, chunki ularning qurollarida o'qlar bo'sh edi. Biroq tahdid real ekanligini anglagach, ular dushmanni to'xtatish uchun birlashishga majbur bo'lishadi. Filmning eng kuchli jihatlaridan biri bu tabiiy landshaftlarda tasvirga olingan realistik sahnalardir. Tog'li hududlar, qoyalar va qalin o'rmonlar tomoshabinga voqealar ichida yashayotgandek tuyg'u beradi.
Kartina ortiqcha cho'zilishlar va keraksiz sahnalardan xoli bo'lib, voqealar juda tez rivojlanadi. Taxminan yigirma nafar professional askarning harakati va ularning o'zaro hamkorligi filmga ishonchlilik bag'ishlaydi. Agar siz dam olish kunlari harbiy mavzu va fantastikani uyg'unlashtirgan sifatli kino izlayotgan bo'lsangiz, Harbiy mashina ayni muddao bo'ladi.
