Obid Asomov o‘g‘li nohaq o‘qishdan haydalganidan shikoyat qildi

«UzNews.uz» nashri orqali «Gubkin» filialidan 23 nafar talabaning o‘qishdan haydalishi haqida maqola chop etilganidan so‘ng, nashrga Obid Asomov qo‘ng‘iroq qilib, shikoyati borligini bildirgan.

Taniqli qiziqchining ma’lum qilishicha, o‘tgan o‘quv yilida san’atkorning o‘g‘lini «aldab» o‘qishdan haydab yuborishgan va Obid Asomovning o‘zini ham ushbu o‘quv maskani rektori bir necha bora aldagan. U farzandini «tushunib bo‘lmas bahona» sabab o‘qituvchi matematika imtihonlaridan o‘tkazmagan. Talabani universitetda qoldirishning bir yo‘li esa uni akademik ta’til olishi rektor tomonidan maslahat berilgan hamda ta’tilga yozilishi kerak bo‘lgan ariza o‘rniga, talabadan o‘z xohishiga ko‘ra o‘qishdan ketishi borasidagi ariza yozdirib olingan. Obid Asomovning o‘g‘liga nega bu shaklda ariza yozding degan savoliga o‘g‘il ham «bo‘ldi hammasi yaxshi bo‘ladi borib, ularning aytganini qil degansizku», deb javob bergan. Talabaning hayotiy tajribasi yo‘qligi, yoshligidan foydalangan universitet tomoni uni o‘qishdan haydagan.

Bu o‘quv dargohida barcha masalalar Moskva orqali hal etilishi, Moskvadagilar nima desa o‘sha ish bo‘lishini rektor aytganini san’atkor xohlagan paytda isbotlab berishi mumkinligini ham qo‘shimcha qildi.

Obid Asomovning o‘g‘lini o‘z xohishiga ko‘ra o‘qishdan ketishi to‘g‘risidagi ariza yozdirib olishdan kimga foyda ekanligini bilmadigu, lekin keyingi talabani qabul qilinishini nazarga oladigan bo‘lsak, bitta talaba haydalib keyingisi kelishi qancha daromad olib kelishini Rossiya davlat universitetining O‘zbekistondagi filiali faoliyati bilan tanish bo‘lganlar yaxshi bilishadi.

Aynan bu Filialdan talabalarning haydalishi va norozilik holatlarining ko‘pligi bo‘yicha “UzNews.uz” jurnalistik surishtiruvni davom ettiradi.
“Zamin” yangiliklarini “Telegram”da kuzatib boring