1-iyuldan dorilarni sotish tartibi o'zgaradi

O'zbekistonda 1 iyuldan boshlab import dori vositalarini faqatgina rasmiy importyorlar va ularning rasmiy dilerlari sotishi mumkin bo'ladi, deb NOVA24 xabar berdi. Mazkur tartib Prezidentning 23 maydagi qaroridan kelib chiqadi.

Shuningdek, 1 sentyabrdan boshlab farmatsevtika kompaniyalari va aptekalarga litsenziya berishda qo'shimcha talablar joriy etiladi:

• Farmatsevtika faoliyati olib boriladigan binolarga oid ijara yoki bepul foydalanish shartnomalari soliq organlarida ro'yxatdan o'tkazilishi shart.

• Dori vositalarini sotishda plastik karta va boshqa elektron to'lov vositalari orqali to'lovni qabul qilish imkoniyati bo'lishi lozim.

Agar soliq tekshiruvlari davomida kompaniyaning kontrafakt dori vositalarini (kelib tushish hujjatlarisiz) yoki raqamli markirovkasiz dori vositalarini xarid qilishi, tashishi, saqlashi yoki sotishi aniqlansa, litsenziya vaqtincha to'xtatilishi mumkin.

1 iyuldan boshlab O'zbekistonga olib kirilgan dori vositalarini chakana va ulgurji sotuvchilarga faqatgina import qiluvchi tashkilot yoki uning rasmiy dilerlari orqali va elektron hisob-faktura asosida realizatsiya qilishga ruxsat beriladi. Shu bilan, mustaqil vositachilar va vakolatsiz tashkilotlar bunday dori vositalarini qonuniy ravishda sota olmaydi.