O‘zbekistonda to‘lov tizimlari kiberjinoyatlardan himoyalanadi

O‘zbekistonda to‘lov tizimlari va to‘lov tashkilotlari kiberjinoyatlardan himoya qilinadi. Barcha to‘lov tizimlari va xizmatlari operatorlari xatarlarni boshqarish tizimini joriy etishlari shart bo‘ladi, deb nova24.uz xabar berdi.

To‘lov tizimlari va to‘lov tashkilotlarini tartibga solish to‘g‘risidagi qonun loyihasi Qonunchilik palatasidan o‘tdi, deya xabar berdi Oliy Majlis Qonunchilik palatasi matbuot xizmati.

Ma’lumotga ko‘ra, deputatlar naqd pulsiz to‘lovlar sohasida xatarlarni boshqarishni takomillashtirish bo‘yicha qonun loyihasini birinchi va ikkinchi o‘qishda qabul qildilar. Ushbu loyiha "Markaziy bank to‘g‘risida", "To‘lovlar va to‘lov tizimlari to‘g‘risida", "Aksiyadorlik jamiyatlari va aksiyadorlar huquqlarini himoya qilish to‘g‘risida", "Litsenziyalash, ruxsat berish va xabardor qilish tartib-qoidalari to‘g‘risida"gi qonunlarga tuzatishlar va qo‘shimchalarni o‘z ichiga oladi.

Xususan, loyihada barcha to‘lov tizimlari va xizmatlari operatorlari xatarlarni boshqarish tizimini joriy etishi va Markaziy bank tomonidan belgilangan minimal talablarga rioya etishi nazarda tutilgan. Qayd etilishicha, bu choralar firibgarlik va boshqa turdagi kiberjinoyat xatarlarining o‘sishi bilan bog‘liq.

Hukumat to‘lov tashkilotlarini faoliyat sohasiga qarab toifalarga ajratishni rejalashtirmoqda. Shuningdek, muhim to‘lov tashkiloti tushunchasi paydo bo‘ladi. Hujjat kuchga kirishidan oldin Senat tomonidan ma’qullanishi va prezident tomonidan imzolanishi kerak. “Zamin”ni Telegramʻda oʻqing!