O‘zbekistonda avtotransport vositalari soni yil sayin ortmoqda. Milliy statistika qo‘mitasi ma’lumotlariga ko‘ra, joriy yilning 1 iyuli holatiga mamlakatimizda jismoniy shaxslar nomiga ro‘yxatdan o‘tgan avtomashinalar soni 4 million 612,7 mingtaga yetgan.
Ta’kidlanishicha, ushbu ko‘rsatkich o‘tgan yilning mos davriga nisbatan 441,5 mingtaga ko‘pdir. Avtotransport vositalari orasida eng katta ulushni yengil avtomobillar egallab, ularning soni 4 million 289 mingtani tashkil etadi. Bu jami transport vositalarining 93 foiziga teng.
Statistika quyidagicha taqsimlanadi:
yengil avtomobillar — 4 mln 289 ming dona;
yuk avtomobillari — 302,6 ming dona;
mikroavtobuslar — 7,7 ming dona;
maxsus transport vositalari — 7,3 ming dona;
avtobuslar — 6,1 ming dona.
Qo‘mita ma’lumotlariga ko‘ra, joriy yilning 1 aprelida ro‘yxatdan o‘tgan jismoniy shaxslarga tegishli transport vositalari soni 4 million 522,1 mingta bo‘lgan. Demak, keyingi uch oyda ham avtopark sezilarli darajada kengaygan.
Mutasaddilarning ta’kidlashicha, mamlakatda yangi avtomobillar xarid qilish sur’ati yuqori darajada saqlanib qolmoqda, bu esa iqtisodiy faollik va aholi turmush darajasining o‘sishi bilan bevosita bog‘liq.
“Zamin”ni Telegramʻda oʻqing!
