Qo‘shilgan qiymat solig‘i (QQS) tizimiga o‘tayotgan korxonalar bir yil davomida foyda solig‘idan ozod etiladi, deb Kursiv xabar berdi.
Bu haqda Prezident Shavkat Mirziyoyev tadbirkorlar bilan uchrashuvda ma’lum qildi. QQS stavkasi 12 foizga tushirilgani sababli, bu tizimga o‘tayotgan tadbirkorlar soni ortib bormoqda.
Yangi imtiyozlarga ko‘ra, QQSga o‘tayotgan korxonalarda hisob-kitobda xatolik bo‘lsa, jarima qo‘llanmaydi. Shuningdek, buxgalter maoshining 5 million so‘mgacha bo‘lgan qismi 6 oy davomida soliqlardan ozod etiladi.
Yillik aylanmasi 10 milliard so‘mdan oshgan korxonalar uchun amal qilayotgan avans to‘lov talabi endi faqat 20 milliard so‘mdan yuqori aylanmaga ega bo‘lganlarga tatbiq etiladi. Bu orqali 14 mingga yaqin tadbirkorga 1 trillion so‘mlik mablag‘ erkin qoladi.
1-noyabrgacha tadbirkorlar soliqdagi xatolarni mustaqil tuzatib, reytingini “toza sahifadan” boshlash imkoniga ega bo‘ladi. Bu imkoniyat “amnistiya” orqali yaratilgan.
2026-yildan yer, mol-mulk, ijtimoiy va daromad solig‘i bo‘yicha hisobotlarni soliq organlari tayyorlab beradi, tadbirkorlar esa 5 kun ichida ularni ko‘rib chiqib, kerakli tuzatishlarni kiritishi mumkin. Kichik biznes uchun jarimalar miqdori uch barobar kamaytiriladi.
“Zamin”ni Telegramʻda oʻqing!
