Bugun mamlakatimizda ulug‘ va qutlug‘ sana — Mustaqillik bayramiga bag‘ishlangan asosiy marosimlar o‘tkaziladi. Tantanalar davlatimiz rahbari Shavkat Mirziyoyev ishtirokida yurtimiz tarixida muhim ahamiyatga ega ramziy joylarda start oladi.
Avvalo, Prezidentimiz an’anaga ko‘ra Shahidlar xotirasi xiyobonida bo‘lib, mustabid tuzum qurbonlarini yodga oladi hamda ular xotirasiga ehtirom bilan chuqur hurmat izhor qiladi. Shuningdek, “Yangi O‘zbekiston” bog‘ida barpo etilgan Mustaqillik monumenti poydevoriga gulchambar qo‘yish marosimi ham amalga oshiriladi. Bu o‘tmishga hurmat va kelajakka ishonch ramzi sifatida alohida ma’noga ega.
Kunning ikkinchi yarmida bayram tadbirlari yanada keng ko‘lamda davom etadi. Xususan, kechqurun mamlakatimiz mustaqilligining 34 yilligiga bag‘ishlangan bosh tantana bo‘lib o‘tadi. Unda Prezident Shavkat Mirziyoyev xalqimizga samimiy tabrik so‘zlari bilan murojaat qilishi va barcha yurtdoshlarimizni ulug‘ ayyom bilan qutlashini kutmoqdamiz.
Mazkur marosimlar, shubhasiz, nafaqat xalqimizda yuksak ruhiy ko‘tarinkilik uyg‘otadi, balki mustaqillik qadriyatlarini yanada asrab-avaylash va uning mohiyatini keng yoritishga xizmat qiladi. Bugungi kun yurtimiz tarixida yana bir yorqin sahifa sifatida yodda qolishi aniq.
