Toshkent shahridagi barcha umumta’lim maktablarining 10- va 11-sinf xonalariga maxsus kuzatuv kameralari o‘rnatilishi belgilandi. Bu orqali yuqori sinf o‘quvchilarining davomati, ularning fanlarga qiziqishlari hamda ta’lim sifatini samarali nazorat qilish imkoni yaratiladi.
Shu bilan birga, maktablarda “Smart School” elektron tizimi bosqichma-bosqich joriy qilinishi rejalashtirilmoqda. Mazkur dastur orqali sinflarda o‘quvchilarning darsda ishtirok etish darajasi, ta’lim sifati hamda o‘quvchilarning psixologik holati sun’iy intellekt vositasida aniqlanadi. Shuningdek, fanlarga qiziqish ko‘rsatkichlari hamda o‘qituvchilarning pedagogik mahorat darajasi haqida ma’lumot olish imkoniyati yaratiladi.
Shahar hokimi qaroriga muvofiq, mazkur tashabbus yuqori sinflarda ta’lim sifatini oshirish va o‘quvchilarning davomatini kuchaytirish maqsadida amalga oshiriladi. Kameralar har bir tuman mahalliy budjeti mablag‘lari hisobidan o‘rnatiladi.
Eslatib o‘tamiz, bundan avval Olmazor tumanida tajriba sifatida 31 ta umumta’lim maktabidagi 250 ta sinfxona “Smart School” dasturi bilan jihozlangan edi. Sinov natijasida ushbu tizim orqali ta’lim jarayonini nazorat qilish, o‘quvchilar davomatini hisobga olish va ularning fanlarga qiziqishini tahlil qilishda yuqori samara ko‘rsatgan.
Mutasaddilarning fikricha, mazkur loyiha butun Toshkent maktablarida amalga oshirilsa, ta’lim jarayoni sifatini oshirishda muhim qadam bo‘ladi. Shu bilan birga, o‘quvchilarning intizomini kuchaytirish va ularning bilim olishga bo‘lgan qiziqishini yanada orttirishga xizmat qiladi.
“Zamin”ni Telegramʻda oʻqing!
