O‘zbekistonda fermerlarni qo‘llab-quvvatlash va to‘qimachilik sohasini yanada rivojlantirish maqsadida yangi tashabbuslar amalga oshirilmoqda. Prezident Shavkat Mirziyoyev o‘tkazgan videoselektor yig‘ilishida bu haqda atroflicha ma’lumot berildi.
Yangi qarorga ko‘ra, fermerlar endi o‘z vaqtida paxtani yo‘qotmasdan yig‘ib olishlari uchun davlat tomonidan qo‘shimcha moddiy yordam bilan ta’minlanadi. Xususan, har tonna paxta uchun 1 million so‘m miqdorida subsidiya ajratiladi. Bu chora orqali terim mavsumida hosilni yo‘qotish holatlari keskin kamayishi kutilmoqda.
Shu bilan birga, to‘qimachilik korxonalari ham davlat ko‘magi bilan qo‘llab-quvvatlanadi. Agar korxonalar o‘z mablag‘i hisobidan paxta yetishtirsa yoki bozordan xarid qilsa, ularga sarflangan xomashyo qiymatining 10 foizi davlat tomonidan qoplab beriladi. Bu esa ishlab chiqarish xarajatlarini ancha yengillashtiradi va sohaga qo‘shimcha rag‘bat baxsh etadi.
