Oliy Majlis Qonunchilik palatasi deputatlari tomonidan muhokama qilingan qonun loyihasi jamoat xavfsizligi va fuqarolar osoyishtaligini ta’minlashga qaratilgan. So‘nggi yillarda sovuq qurollarni noqonuniy ravishda jamoat joylarida olib yurish holatlari ortib ketgani ma’lum qilindi. Bu esa nafaqat huquq-tartibot tizimi, balki oddiy odamlar hayoti uchun ham jiddiy xavf tug‘dirmoqda, deb xabar berdi mahalliy OAV.
Shu bois, yangi qonun loyihasida bunday huquqbuzarliklarni qayta sodir etgan shaxslarga nisbatan jazo choralari qat’iylashtirilishi nazarda tutilmoqda. Masalan, oilaviy tazyiq yoki zo‘ravonlik sodir etganlarga qurol olish huquqi berilmaydi. Shuningdek, bolalarga nisbatan zo‘ravonlik qilgan shaxslarda mavjud qurollar ichki ishlar organlari tomonidan vaqtincha musodara qilinishi mumkin.
Yana bir muhim qoida — narkologik kasallikka chalingan shaxslarning majburiy davolanishi bilan bog‘liq. Endi hatto bir marta ma’muriy javobgarlikka tortilgan fuqaro ham sud qaroriga ko‘ra davolash muassasasiga yuborilishi mumkin bo‘ladi.
Mutasaddilar ta’kidlashicha, qonunning asosiy maqsadi — huquqbuzarliklarning oldini olish, mahallalardagi kriminogen vaziyatni barqarorlashtirish va fuqarolar hayoti hamda sog‘ligini samarali himoya qilishdan iborat. Shu yo‘nalishdagi tashabbuslar jamoatchilik tomonidan ijobiy baholanmoqda, chunki qonun tartibotini ta’minlash — har bir inson xavfsizligini asrash demakdir.
Qonun loyihasi birinchi o‘qishda deputatlar tomonidan ma’qullandi. Endi hujjat qonunchilik jarayonining keyingi bosqichlarida ko‘rib chiqiladi.
“Zamin”ni Telegramʻda oʻqing!
