Qozog‘istonning Olmaota viloyatida yuz bergan mudhish portlash butun jamoatchilikni iztirobga soldi. Joriy yil 11 sentyabr kuni Ili tumani, Bayserke qishlog‘ida joylashgan LGN Metal korxonasida sodir bo‘lgan portlash oqibatida uch nafar O‘zbekiston fuqarosi hayotdan ko‘z yumdi. Bu haqda Migratsiya agentligi rasmiy bayonot berdi.
Agentlik marhumlarning oila a’zolari va yaqinlariga chuqur ta’ziya izhor etar ekan, ularga sabr-qanoat tiladi. Shu bilan birga, hodisa jamoatchilikda katta qayg‘u uyg‘otgani ta’kidlandi.
Rasmiy ma’lumotlarga ko‘ra, voqea yuzasidan Ili tumani politsiyasi tomonidan jinoyat ishi qo‘zg‘atilgan. Tergov mehnat muhofazasi qoidalari buzilishi natijasida insonlarning o‘limiga olib kelgan holat sifatida ko‘rib chiqilmoqda. Hozirda maxsus komissiya ish olib bormoqda, hodisaning barcha jihatlari o‘rganilmoqda.
O‘zbekiston Respublikasi Migratsiya agentligi esa o‘z fuqarolarining jasadlarini yurtga olib kelish uchun zarur hujjatlarni rasmiylashtirish ishlarini jadal tashkil etgan. Shuningdek, hududiy agentlik xodimlari marhumlarning oilalari bilan doimiy muloqotda bo‘lib, ularga amaliy va ma’naviy yordam ko‘rsatmoqda.
Ma’lum qilinishicha, hozirda O‘zbekiston va Qozog‘istonning mas’ul idoralari o‘rtasida hamkorlik yo‘lga qo‘yilgan. Tergov jarayonining borishi qat’iy nazorat ostida saqlanmoqda.
Mutaxassislar ta’kidlashicha, bu kabi fojealar mehnat xavfsizligi masalasiga yanada jiddiy e’tibor qaratish zarurligini ko‘rsatadi. Jamoatchilik esa halok bo‘lgan o‘zbek ishchilari jasadlari yurtga qaytarilishi ularning oilalari uchun kichik bo‘lsa-da, yuraklarni tinchlantiradi, deb hisoblamoqda.
“Zamin”ni Telegramʻda oʻqing!
