Prezidentning 2021 yil 5 martdagi PQ-5020-sonli qarori asosida hokimliklar orqali moddiy qiyin ahvolda bo‘lgan ayrim talabalarga qo‘shimcha yordam ko‘rsatiladi. Unga ko‘ra, birinchi bosqichga qabul qilingan 40 nafar, ikkinchi va undan yuqori kurslarda tahsil olayotgan 110 nafar talaba-qizning bazaviy shartnoma mablag‘lari davlat hisobidan qoplab beriladi.
Shartnoma to‘lovlari quyidagi toifadagi xotin-qizlarga to‘lanadi:
– “Ijtimoiy himoya yagona reyestri”da kam ta’minlangan deb qayd etilgan oilalardagi talaba-qizlar;
– yetim yoki ota-onasiz qolgan qizlar;
– turmush o‘rtog‘i vafot etgan hamda voyaga yetmagan farzandlarini yolg‘iz tarbiyalayotgan muhtoj ayollar.
Biroq qarorda ayrim cheklovlar ham bor. Xususan, ikkinchi mutaxassislik bo‘yicha tahsil olayotganlar, shuningdek, O‘zbekistondagi xorijiy yoki xususiy oliy o‘quv yurtlarida o‘qiyotgan talaba-qizlarning shartnoma to‘lovlari davlat tomonidan qoplanmaydi.
Mazkur tashabbus mahalliy budjet imkoniyatlari hisobidan amalga oshiriladi va xotin-qizlarning oliy ta’lim olish jarayonida qo‘shimcha ijtimoiy yordam sifatida ko‘rilayotgani bilan ahamiyatlidir.
