Senator Erkin Gadoyev poytaxtda yo‘llardagi qatorlik va tirbandliklarni kamaytirish masalasini qo‘llab, Transport vazirligiga rasmiy so‘rov yubordi. Bu haqda Oliy Majlis Senati ma’lum qildi.
Ma’lum qilishlaricha, o‘quv yili boshlanishi bilan Toshkent shahrida harakat keskin kuchayadi va ayrim vaqtlarda tirbandlik darajasi eng yuqori — 10 ballgacha bo‘ladi. Bu esa ishga, ta’limga va turli maqsadlarda poytaxtga yo‘l olgan minglab fuqarolarning vaqti va samaradorligini sezilarli darajada pasaytiradi.
Statistikaga ko‘ra, har kuni 1 millionga yaqin kishi poytaxtga tashrif buyuradi, shundan taxminan 275 ming nafari Toshkent viloyatidan keladi. Hududning barcha qismlaridan minglab avtomobillar ertalab poytaxtga kirib, kechqurun qaytishi tirbandliklarni yanada kuchaytiradi.
Senatorning so‘rovida vazirlikdan Toshkent shahrida tirbandliklarni kamaytirish bo‘yicha amalga oshirilayotgan choralar, «Intellektual transport» tizimining amaldagi holati, prezident tomonidan belgilangan vazifalarning bajarilishi va kechikish sabablari haqida ma’lumot taqdim etish so‘ralgan.
Bundan oldin ham senator Kobul Tursunov raqamli texnologiyalar vaziri Sherzod Shermatovga IMEI kodlarni ro‘yxatdan o‘tkazishda yuzaga kelayotgan muammolar yuzasidan so‘rov yuborgandi.
Ushbu tashabbus poytaxtdagi yo‘l harakati va fuqarolarning harakatini yaxshilashga qaratilgan muhim qadam sifatida baholanmoqda.
“Zamin”ni Telegramʻda oʻqing!
