Milliy statistika qo‘mitasi ma’lumotiga ko‘ra, 2025 yil 1 oktyabr holatida O‘zbekiston aholisi 38 million 69 ming nafardan oshdi, deb xabar berdi qo‘mita.
Ma’lumotlarga ko‘ra, aholining 19,1 millioni erkaklar (50,4 foiz), 18,9 millioni esa ayollar (49,6 foiz) hisoblanadi. Bu ko‘rsatkich o‘tgan yilning mos davriga nisbatan 713,7 ming nafarga yoki 1,9 foizga ko‘pdir.
Shuningdek, aholining 51 foizi shaharlarda, 49 foizi esa qishloq joylarda istiqomat qilmoqda. Shahar aholisi soni 19,3 million, qishloq joylarda yashovchilar esa 18,6 million nafarni tashkil etmoqda.
Yil boshidan buyon mamlakatda 177 mingta nikoh qayd etilgan bo‘lib, 35,4 ming oila ajrashgan. Tashqi migratsiya bo‘yicha esa 9 oy ichida 1 133 kishi mamlakatga ko‘chib kelgan, 7 585 kishi esa chet elga ko‘chib ketgan.
Muttaxassislar ta’kidlashicha, aholi o‘sishi barqarorlik va iqtisodiy imkoniyatlar kengayishi bilan bog‘liq bo‘lib, bu demografik ko‘rsatkich mamlakatdagi ijtimoiy o‘zgarishlarning muhim ifodasi sanaladi.
“Zamin”ni Telegramʻda oʻqing!
