O‘zbekiston prezidenti Shavkat Mirziyoyev Qatardagi amaliy tashrifini yakunlab, AQSHga jo‘nab ketdi, deb xabar berdi Prezident matbuot xizmati.
Doha shahrida davlat rahbari Ijtimoiy rivojlanish bo‘yicha ikkinchi jahon sammitida ishtirok etib, barqaror ijtimoiy taraqqiyot va global sheriklikni mustahkamlash bo‘yicha qator tashabbuslarni ilgari surdi. Shuningdek, Qatar Amiri Shayx Tamim bin Hamad Ol Soniy bilan uchrashuv o‘tkazdi.
Shayx Hamad xalqaro aeroportida Prezidentni Qatar Bosh vazir o‘rinbosari va mudofaa vaziri Shayx Saud bin Abdurahmon Ol Soniy kuzatib qo‘ydi.
Shavkat Mirziyoyev AQSH prezidenti Donald Tramp taklifiga binoan Vashington shahrida bo‘lib o‘tadigan “C5+1” formatidagi sammitda ishtirok etadi.
Tashrif doirasida AQSH prezidenti, Kongress vakillari hamda vazirlik rahbarlari bilan uchrashuvlar belgilangan. Suhbatlarda savdo, investitsiya, insonparvarlik va mintaqalararo hamkorlikni rivojlantirish masalalari muhokama qilinadi.
Shuningdek, ishbilarmonlik tadbirlari doirasida AQSHning yirik kompaniya va moliya institutlari bilan muzokaralar o‘tkazilishi rejalashtirilgan. Tashrif yakunida bir qator ikki va ko‘p tomonlama hujjatlar imzolanishi kutilmoqda.
“Zamin”ni Telegramʻda oʻqing!
