O‘zbekistonda kelasi yil 1 yanvardan davlat ijtimoiy sug‘urtasining yangicha tizimi ishga tushadi, deb xabar berdi Adliya vazirligi.
Prezidentning PF–206-sonli farmoniga muvofiq, yangi tartib fuqarolarga ijtimoiy himoya xizmatlarini qulay va tezkor tarzda olish imkonini yaratadi.
Yangi tizimga ko‘ra, fuqarolar sug‘urta dasturiga ikki usulda qo‘shila oladi — majburiy yoki ixtiyoriy ravishda. Majburiy sug‘urta jismoniy shaxslar daromad solig‘ining ma’lum qismi hisobidan amalga oshiriladi. Ixtiyoriy sug‘urtaga qo‘shilmoqchi bo‘lganlar esa har oy eng kam ish haqining 5 foizi miqdorida badal to‘laydilar.
Sug‘urta to‘lovlari miqdori fuqarolarning to‘lov staji va to‘langan mablag‘ hajmiga qarab belgilanadi.
Yangi tizimning yana bir muhim jihati — ayrim nafaqalarni avtomatik ravishda tayinlash imkoniyatidir. 2026 yil 1 yanvardan homiladorlik va tug‘ruq nafaqasi, shu yil 1 iyuldan vaqtinchalik mehnatga layoqatsizlik nafaqasi hujjat talab qilinmasdan jamg‘arma tomonidan proaktiv ravishda to‘lanadi.
2030 yildan boshlab ishdan bo‘shatilganlik nafaqasi ham shu usulda tayinlanishi rejalashtirilgan.
Takliflarga ko‘ra, nafaqa miqdori ish stajiga bog‘liq bo‘ladi: 8 yilgacha stajga ega bo‘lganlarga ish haqining 60 foizi, 8 yildan ortiq stajga egalariga esa 80 foizi to‘lanadi. Shuningdek, 4 yoki undan ko‘p farzandi bor, yoki nogiron farzand parvarishlayotgan oilalar uchun nafaqa yana 20 foizga ko‘paytiriladi.
“Zamin”ni Telegramʻda oʻqing!
