O‘zbekistonda davlat ijtimoiy sug‘urtasi tizimi bosqichma-bosqich yangilanmoqda, deb xabar berdi Adliya vazirligi.
Prezident tomonidan 3 noyabr kuni imzolangan farmonga muvofiq, 2026 yil 1 yanvardan homiladorlik, tug‘ruq va bola tug‘ilishi bo‘yicha nafaqalar fuqarolarning arizasisiz, proaktiv usulda tayinlanadi va to‘lanadi.
Shuningdek, 2026 yil 1 iyuldan vaqtinchalik mehnatga layoqatsizlik nafaqalari ham avtomatik hisoblanadi. Bu jarayon nogironlik varaqasi asosida amalga oshiriladi.
Yangi ijtimoiy sug‘urta tizimi fuqarolarga daromad solig‘ining bir qismi yoki ixtiyoriy tarzda har oy to‘lanadigan sug‘urta badallari orqali qo‘shilish imkonini beradi. To‘lovlar miqdori eng kam sug‘urta muddati va to‘langan badallar asosida belgilanadi.
Nafaqalar Davlat ijtimoiy sug‘urta jamg‘armasi orqali moliyalashtiriladi. 2030 yildan boshlab jamg‘arma ishdan bo‘shatish nafaqalarini ham ko‘rib chiqish va to‘lash bilan shug‘ullanadi. Bu holda to‘lov fuqarolarning murojaati asosida amalga oshiriladi.
Mazkur yangiliklar fuqarolarga qulaylik yaratish, ortiqcha hujjatbozlikni bartaraf etish va ijtimoiy himoya tizimini raqamlashtirish orqali shaffof hamda samarali xizmat ko‘rsatishni ta’minlaydi.
“Zamin”ni Telegramʻda oʻqing!
