Farg‘ona viloyatida turizmni “shunchaki sayr”dan real iqtisodiy loyihaga aylantiradigan navbatdagi katta qadam tashlanmoqda. Prezident qarori bilan umumiy maydoni 2 396 gektarni qamrab oladigan “Farg‘ona” turistik-rekreatsion zonasi tashkil etilishi belgilandi.
Qarorga ko‘ra, turistik zona 30 yil muddatga yo‘lga qo‘yiladi va keyinchalik bu muddatni uzaytirish imkoniyati ham nazarda tutilgan. Bu degani: loyiha bir mavsumlik “shov-shuv” emas, uzoq masofaga mo‘ljallangan strategiya.
Eng qiziq joyi — Farg‘ona tumanidagi “Vodil” malina agroturizm klasterini turistik obyekt darajasiga olib chiqish rejalari. Buning uchun infratuzilma yaratiladi, salohiyatli tadbirkorlar jalb qilinadi va malina bog‘lari (plantatsiyalar) hududida yengil konstruksiyali xizmat ko‘rsatish nuqtalari tashkil etilishi aytilmoqda. Ya’ni kelajakda Vodilga borgan odam “rasmga tushdim-u qaytdim” emas, mazmunli dam oladigan, xizmat oladigan formatga o‘tishi mumkin.
Yana bir yo‘nalish: 2026–2027-yillarda Yozyovon tumanidagi Markaziy Farg‘ona suv ombori atrofida turizm xizmatlarini yo‘lga qo‘yish orqali ish o‘rinlari yaratish reja qilingan. Bu hududga servis, dam olish, sayohat xizmatlari kirib kelsa, mahalliy bandlik ham, ichki turizm ham sezilarli tezlashishi mumkin.
Shuningdek, Farg‘ona tumanining “Sanoat” va “Hosilot” MFY hududlarida xorijiy tajriba asosida malina plantatsiyalarini ko‘paytirish, muzlatkichlar hamda chuqur qayta ishlash sexlarini qurish orqali agroturizm xizmatlarini kuchaytirish ko‘zda tutilgan. Qisqasi: faqat sayyoh kelishi emas, mahsulotni saqlash va qayta ishlash zanjiri ham birga yuradi.
“Zamin”ni Telegramʻda oʻqing!
