O'zbekistonda 82 turdagi sanoat xomashyosi va yarim tayyor mahsulotlar bojxona boji to'lanmasdan olib kiriladi
Prezidentning 19-yanvardagi farmoniga muvofiq, mahalliy ishlab chiqaruvchilar uchun yangi bojxona imtiyozlari joriy etildi. Hujjatga ko'ra, sanoat xomashyosi va yarim tayyor mahsulotlarning 82 turiga import bojlari nolga tushirildi. Bu haqda podrobno.uz xabar beradi.
Yangi tartib ikki yil amal qiladi va 2027-yil 1-yanvargacha kuchda bo'ladi. Bu orqali real sektorni qo'llab-quvvatlash hamda tayyor mahsulot tannarxini pasaytirish maqsad qilingan.
Ushbu amaliyot avval ham qo'llangan: mazkur xomashyo bo'yicha bojxona preferensiyalari ilk bor 2021-yil oktyabrida joriy etilgan, biroq ularning muddati 2024-yil 1-yanvarda yakunlangan edi. Ikki yillik tanaffusdan so'ng hukumat imtiyozlarni qayta tiklab, uzaytirishga qaror qildi.
Ro'yxat turli tarmoqlar uchun strategik ahamiyatga ega materiallarni qamrab oladi. Unda, asosan, to'qimachilik va kimyo sanoati uchun komponentlar katta ulushni egallaydi.
Bojdan ozod etilgan asosiy toifalar qatorida kaustik soda, o'yuvchi kaliy, kastor yog'i, turli karbid va peroksidlar kabi kimyoviy mahsulotlar bor. Shuningdek, organik va to'qimachilik bo'yoqlari, titan dioksidi asosidagi pigmentlar, polipigment pastalari hamda keramika uchun shishasimon emallar ham imtiyozli ro'yxatga kiritilgan.
Bundan tashqari, polipropilen, vinilxlorid polimerlari, asetat plyonkalar va neylon lentalar kabi polimer va plastmassa mahsulotlariga ham boj qo'llanmaydi. To'qimachilik xomashyosi bo'yicha esa jun va paxta matolari, zig'ir mato, sun'iy mo'yna, sintetik iplar, tuk va dantel mahsulotlari keltirilgan.
Texnik materiallar kesimida asbest, filtrlash qog'ozi, yelimlangan fanera, shisha tolali buyumlar, shuningdek, yondirgichlar qismlari va birlamchi batareyalar ham ro'yxatdan o'rin olgan.
“Zamin”ni Telegramʻda oʻqing!
