Toshkentdagi Jahon banki vakolatxonasida davlat xaridlari tizimini yangilash va takomillashtirish masalalariga bag‘ishlangan seminar bo‘lib o‘tdi. Tadbir Jahon bankining Yevropa va Markaziy Osiyo mintaqasida xaridlar yo‘nalishi rahbari Felipe Goyaning ishchi tashrifi doirasida tashkil etildi. Bu haqda uzdaily.uz xabar beradi.
Seminarda Iqtisodiyot va moliya vazirligi, Investitsiyalar, sanoat va savdo vazirligi vakillari, davlat xaridlari bo‘yicha elektron platformalar operatorlari, shuningdek xalqaro moliya institutlari — Jahon banki, Osiyo taraqqiyot banki va Islom taraqqiyot banki mutaxassislari ishtirok etdi.
Muloqot davomida O‘zbekistonda davlat xaridlari tizimini rivojlantirishning ustuvor yo‘nalishlari muhokama qilindi. Jahon banki tomonidan o‘tkazilgan baholash natijalari taqdim etilib, amaldagi islohotlar holati, mavjud to‘siqlar hamda sohani yanada yaxshilash bo‘yicha tavsiyalar yoritildi.
Shuningdek, Jahon banki va Osiyo taraqqiyot bankining O‘zbekistonda davlat organlarining xaridlar sohasidagi salohiyatini oshirishga qaratilgan tadqiqotlari natijalari ko‘rib chiqildi. Alohida e’tibor elektron davlat xaridlari (eGP) tizimlarini ayrim tarmoqlarda joriy etish bo‘yicha ustuvor choralar, xalqaro moliya institutlarining bu jarayondagi ko‘magi hamda ekologik va energiya tejamkor tovar va xizmatlarni ustuvor xarid qilishni nazarda tutuvchi “yashil” davlat xaridlarini kengaytirish amaliyotlariga qaratildi.
Bundan tashqari, tizimning shaffofligi va samaradorligini ta’minlash uchun belgilangan choralar ijrosini monitoring qilish mexanizmlari ham muhokama qilindi. Seminar davlat idoralari, xalqaro hamkorlar va ekspertlar o‘rtasida davlat xaridlarini modernizatsiya qilish va raqamlashtirish bo‘yicha ochiq muloqot maydoniga aylandi.
“Zamin”ni Telegramʻda oʻqing!
