Samarqandda karton va qogʻoz ishlab chiqaradigan yirik zavod qurilishi rejalashtirilmoqda
Xitoyning Hanrun Paper Company kompaniyasi Samarqand viloyatida yirik sanoat loyihasini amalga oshirish uchun 500 million AQSH dollari miqdorida sarmoya kiritmoqchi. Bu haqda kompaniya vakillari viloyat hokimi Adiz Boboyev bilan uchrashuvda maʼlum qildi. Bu haqda uzdaily.uz xabar beradi.
Loyiha doirasida sanoat kartoni, qadoqlash qogʻozi hamda ofis qogʻozi ishlab chiqarishga ixtisoslashgan zamonaviy majmua barpo etilishi ko‘zda tutilgan. Qurilish va ishga tushirish jarayonlari besh bosqichda amalga oshiriladi.
Ishlab chiqarishni joylashtirish uchun 50 gektardan ortiq yer maydoni talab etiladi. Hozirda Urgut erkin iqtisodiy zonasi hududidagi “Hishrau 2” massivida joylashgan yer uchastkalari ko‘rib chiqilmoqda va yaqin kunlarda ular auksionga chiqarilishi kutilmoqda.
Investorlar taʼkidlashicha, ushbu zavod Markaziy Osiyoda o‘xshashi bo‘lmagan yagona korxonaga aylanishi mumkin. Loyiha hisobiga qariyb 3 mingta yangi ish o‘rni yaratilishi rejalashtirilgan.
Shuningdek, korxona ishga tushgach, davlat budjetiga yiliga 50–60 million AQSH dollari miqdorida soliq tushumlari kelib tushishi prognoz qilinmoqda. Viloyat hokimi loyiha hududning ijtimoiy-iqtisodiy rivojlanish ustuvor yo‘nalishlariga mos ekanini bildirib, tashkiliy va infratuzilmaviy masalalarni tezkor hal qilish hamda loyiha jarayonini doimiy qo‘llab-quvvatlash bo‘yicha to‘liq ko‘mak berilishini maʼlum qildi.
“Zamin”ni Telegramʻda oʻqing!
