O‘zbekiston oltin zaxiralari hajmi 390,3 tonnaga yetib, dunyo reytingida 14-o‘rinni egalladi. Bu haqda Jahon oltin kengashi hisobotida qayd etildi.
Tahlillarga ko‘ra, respublika bu ko‘rsatkich bilan Portugaliyani (382,7 tonna) va Qozog‘istonni (341 tonna) ortda qoldirgan. 2025 yilning o‘zida O‘zbekiston 7,8 tonna qimmatbaho metall sotib olgan. 2020–2025 yillar oralig‘idagi umumiy xarid esa 54,4 tonnaga teng bo‘lgan.
Jahon miqyosida 2025 yilda oltin xaridi bo‘yicha Polsha yetakchiga aylangan: mamlakat Markaziy banki bir yil davomida qariyb 102 tonna oltin jamlagan. Keyingi o‘rinlarda Qozog‘iston (57 tonna) va Ozarbayjon (53,4 tonna) keladi. Braziliya hamda Turkiya ham yetakchi beshlikka kirgan.
Oltin narxi ham keskin sakradi: 2025 yil boshida bir unsiya taxminan 2 800 dollar atrofida bo‘lgan bo‘lsa, 2026 yil boshida 5 000 dollardan ham oshgan. O‘tgan yili asosiy sotuvchilar sifatida Singapur (26,4 tonna) va Rossiya (6,2 tonna) tilga olingan, uzoq muddatda esa Xitoy 2020 yildan beri 358 tonna bilan eng yirik xaridor bo‘lib qolmoqda.
Eng katta zaxira AQShda — 8 100 tonna. 2026 yil 1 fevral holatiga ko‘ra, O‘zbekistonning oltin-valyuta zaxiralari 75 mlrd dollarga yetgan, shundan 65 mlrd dollari oltin zaxirasining qiymati hisoblanadi. Bu trend davom etsa, O‘zbekistonning reytingda yanada yuqorilash imkoniyati katta.
“Zamin”ni Telegramʻda oʻqing!
