O'zbekistonda ko'chmas mulk bozorini tartibga solish va fuqarolar manfaatlarini himoya qilish maqsadida muhim o'zgarishlar kutilmoqda. 2026 yil 1 apreldan boshlab uy-joy oldi-sotdi shartnomalari faqat naqd pulsiz shaklda, ya'ni banklar orqali amalga oshirilishi shart bo'ladi. Bu qadam qurilish sohasidagi yashirin iqtisodiyotni qisqartirish va soliq tushumlarini oshirishga xizmat qiladi. Bu haqda podrobno.uz xabar beradi.
Shuningdek, 25 million so'mdan yuqori bo'lgan barcha tovar va xizmatlar uchun naqd pulsiz hisob-kitob tartibi joriy etiladi. Ushbu qoida davlat xizmatlari, kommunal to'lovlar, alkogol va tamaki mahsulotlari hamda 10 yildan kamroq vaqt oldin ishlab chiqarilgan avtomobillar savdosiga ham tatbiq etiladi.
Eng muhim yangiliklardan biri bu qurilish sohasida eskrou tizimining majburiy joriy etilishidir. Qurilish va uy-joy kommunal xo'jaligi vazirligi tomonidan ishlab chiqilgan qonun loyihasiga ko'ra, endilikda xaridorlar mablag'i to'g'ridan-to'g'ri quruvchiga emas, balki bankdagi maxsus eskrou hisob raqamiga o'tkaziladi. Quruvchi kompaniya ushbu mablag'ni faqat uy to'liq bitib, hujjatlari rasmiylashtirilgandan keyingina olishi mumkin bo'ladi.
Ushbu tizim fuqarolarni firibgarliklardan himoya qiladi va qurilishdagi chala qolgan obyektlar bilan bog'liq muammolarni bartaraf etadi. Hozirda ixtiyoriy ravishda ishlayotgan eskrou tizimi 2026 yil 1 iyuldan boshlab butun respublika bo'ylab majburiy tus oladi. Hukumat ushbu qonun loyihasini tez fursatda qabul qilib, qurilish sektoridagi xavflarni minimallashtirishni rejalashtirmoqda.
“Zamin”ni Telegramʻda oʻqing!
