Toshkent shahar hokimligi matbuot xizmati poytaxt aholisi va mehmonlarini bugun kuzatilayotgan noqulay ob-havo sharoiti yuzasidan ogohlantirdi. Shaharda kuchli shamol va yog'ingarchilik bo'layotgani sababli fuqarolardan ehtiyotkorlik choralarini ko'rish so'ralmoqda.
Mutasaddilarning ta'kidlashicha, bunday ob-havo sharoitida elektr uzatish simlarining uzilishi hamda daraxtlarning qulashi kabi xavfli holatlar yuzaga kelishi mumkin. Shu bois, avtomobil egalariga o'z transport vositalarini daraxtlar va elektr tarmoqlari ostida qoldirmaslik qat'iy tavsiya etiladi.
Shuningdek, shahar ko'chalarida harakatlanish vaqtida xavfsizlik qoidalariga rioya qilish, o'zingiz va yaqinlaringiz hayotini hamda shaxsiy mulkingizni asrash muhimligi eslatib o'tildi. Hozirgi vaqtda barcha tegishli kommunal va qutqaruv xizmatlari to'liq shay holatga keltirilgan bo'lib, yuzaga kelishi mumkin bo'lgan muammolarni tezkorlik bilan bartaraf etishga tayyor.
Agar qandaydir favqulodda vaziyat yuz bersa, fuqarolar zudlik bilan 112, 1055 qisqa raqamlariga yoki 71 212 69 80, 71 212 69 82 telefon raqamlari orqali mas'ul xizmatlarga murojaat qilishlari so'raladi.
“Zamin”ni Telegramʻda oʻqing!
