Toshkent shahrida haydovchilar uchun muhim eʼlon qilindi. 2 maydan 11 maygacha poytaxt markazidagi qator koʻchalarda transport harakati vaqtincha cheklanadi.
Maʼlum qilinishicha, mazkur cheklovlar Tashkent Flowers Fest — 2026 gullar festivali oʻtkazilishi munosabati bilan joriy etilmoqda. Tadbir Oʻzbekiston Milliy kutubxonasi oldidagi maydonda 7–9 may kunlari boʻlib oʻtadi.
Hokimlik axborotiga koʻra, festivalga tayyorgarlik va uni oʻtkazish davomida quyidagi hududlarda transport vositalari harakati cheklanadi:
- Zarafshon koʻchasining Hyatt Regency Tashkent yaqinidan Mustaqillik shoh koʻchasigacha boʻlgan qismi;
- Istiqlol koʻchasining Amir Temur shoh koʻchasi va Buyuk Turon koʻchasi oraligʻidagi qismi;
- Buyuk Turon koʻchasining Istiqlol koʻchasi kesishmasidan Yoshlar ijod saroyigacha boʻlgan qismi.
Mutasaddilar haydovchilardan ushbu kunlarda harakat yoʻnalishlarini oldindan rejalashtirishni soʻramoqda. Alternativ yoʻllardan foydalanish orqali tirbandliklarning oldini olish mumkin.
Festival doirasida poytaxtda gullar koʻrgazmalari, madaniy tadbirlar va turli tomoshalar tashkil etilishi kutilmoqda.
