Fayzullaev: "Tarkibimizdagi barcha futbolchilar oʻz chempionatlarida yaxshi formaga kirib olishdi"

Bugun Oʻzbekiston terma jamoasi "Bunyodkor" stadionida oʻyinoldi rasmiy mashgʻulotini oʻtkazdi. Unda qatnashgan Oʻzbekiston terma jamoasi a'zosi Abbos Fayzullaev jurnalistlarning bir qator savollariga javob berdi.

- Terma jamoamiz navbatdagi yigʻinga kirishdi. Eronga qarshi uchrashuvga tayyorgarlik qanday kechmoqda?
- Barchasi yaxshi. Futbolchilar sogʻ. Tarkibimizdagi barcha futbolchilar oʻz chempionatlarida yaxshi formaga kirib olishdi. Bu bizga ancha qoʻl keladi.

- Terma jamoamiz bosh murabbiyi Srechko Katanets sogʻligʻi bilan bogʻliq muammolar tufayli navbatdagi uchrashuvlarda ishtirok eta olmaydigan boʻldi. Bu xabar jamoa ruhiyatiga qanchalik ta'sir qildi?
- Bu holat birinchi marotaba boʻlayotgani yoʻq. "Mister"ga sogʻliq tilayman va tezroq terma jamoaga qaytsinlar. Ushbu tarkib ancha vaqtdan beri birga. Biz maydonda nima qilishni bilamiz, sababi uch yildan beri birga oʻynab kelmoqdamiz.

- Erondek kuchli jamoaga qarshi qanday tayyorgarlik koʻryapsizlar?
- Bu katta oʻyin. Eron – katta terma jamoa. Ertaga maydonga kuchli ishtiyoq bilan tushib, uch ochkoni qoʻlga kiritishni maqsad qilganmiz.

- Eron terma jamoasi tarkibida oʻzgarishlar boʻldi. Eronning asosiy tarkib futbolchisi Hussayn Kanoni jarohati sabab yigʻinlarda ishtirok etmayapti. Himoya chizigʻidagi yoʻqotish bizga qanchalik qoʻl kelishi mumkin?
- Toʻgʻrisi, Eron futbolini koʻp kuzatmayman va koʻp ma'lumotga ega emasman. Eron juda kuchli terma jamoaligini aniq bilaman. Saralashda har bir ochko juda katta ahamiyatga ega. Ertangi uchrashuvda uch ochkoni qoʻlga kiritishni maqsad qilganmiz.

Eslatib oʻtamiz, JCh 3-saralash bosqichi doirasidagi Oʻzbekiston – Eron bellashuvi ertaga 19:00 da boshlanadi. Uchrashuvga "Bunyodkor" stadioni mezbonlik qiladi. “Zamin” yangiliklarini “Telegram”da kuzatib boring