Jaloliddin Masharipov nega penaltini Shukurovga berganini aytdi

Oʻzbekiston terma jamoasining BAA ustidan qozongan gʻalabasidan soʻng jamoa futbolchisi Jaloliddin Masharipov miks-zonada intervyu berdi.

"Gʻalaba bilan Oʻzbekiston xalqini tabriklayman. Rejamiz shu edi – chiroyli oʻyin yoki boshqa narsa emas, faqat gʻalaba. Raqobatchilardan ochkolar boʻyicha farqni kattalashtirish kerak edi. Vaziyatlarimizdan foydalanganimizda bemalol yirik hisobda gʻalaba qozonishimiz mumkin edi. Eng muhimi uch ochkoni qoʻlga kiritdik", - deydi Jaloliddin Masharipov.

- Eronga qarshi oʻyinda muhim ikki ochko yoʻqotildi. Bu oʻyindan oldin jamoada bosim yoʻqmidi?

- Bosim yoʻq edi. Biz Eronga qarshi oʻynadik. Ha, ular kamchilik boʻlib qoldi. Lekin baribir Eron kuchli jamoa. Oldin ham Eron kamchilik boʻlib BAAni magʻlub qilganini koʻrganman. Bizda yaxshi vaziyatlar boʻldi. Oʻzimda ham vaziyat boʻldi, oʻsha holatda gol urilganda gʻalaba qozonardik. Eron Jahon chempionatining muntazam ishtirokchisi, bizda esa bu kabi katta tajriba yoʻq. Jahon chempionati sari qadam tashlab ketmoqdamiz.

- Oʻyinda gol kiritish bizga biroz qiyin kechmoqda. Bunga asosiy sabab nima boʻlmoqda?

- Vaziyatlar boʻlmadi emas, vaziyatlar boʻldi. Yakunlashda oʻzimizni ustimizda ishlashimiz kerak.

- Penalti berilgan vaziyatda zarbani oʻzingiz amalga oshirmoqchi edingiz. Keyin Otabek Shukurovni oʻzlari soʻrab oldilarmi yoki oʻzingiz toʻpni berdingizmi?

– Bugun "Shabab Al Ahli"da men bilan birga oʻynagan bir necha futbolchi bor edi. Ular meni qanday zarba berishim haqida darvozabonlarga nimadir dedi. Qatarda qilingan xatoni bugun qaytarishni istamadik. Keyin Otabekka toʻpni berib, ular meni qanday zarba berishimini bilishlari haqida aytdim. Shu sababli toʻpni Shukurovga berdim.

- Birinchi boʻlimda raqib oʻyinni choʻzayotgandek tuyildi. Bu sizlarni oʻyiningizga ta'sir qilmadimi?

- Oʻzbekistondan hamma qoʻrqadi. Raqib vaqtni choʻzib, ochko olib ketish niyatida edi. Biz esa biroz shoshildik. Ular uchun durang gʻalabaga teng edi. Bugun ularning rejasi oʻxshamadi. Biz uch ochkoni qoʻlga kiritdik.

- Keyingi oʻyindagi raqib Qatar. Shu haqida fikr bildirsangiz?

- Xursand qiladigani bu safar hamma safda. Osiyo kubogida toʻrtta asosiy futbolchimiz tarkibda yoʻq edi. Oʻshanda aytgan gapimni bu safar isbotini koʻrasizlar – biz albatta gʻalaba qozonamiz. “Zamin” yangiliklarini “Telegram”da kuzatib boring