Bunaqasi boʻlmagan: Abduqodir Husanov “uchmoqda”...

Frantsiya futbolida jamoalarning eng yaxshi oʻyinchilarini aniqlash muxlislar oʻrtasida soʻrovnomalar oʻtkazish orqali amalga oshirilishi a'nanaga aylangan.

Dekabr oyi yakunlariga koʻra, Frantsiyaning nufuzli nashrlari “Lans”ning eng yaxshi oʻyinchisini aniqlash maqsadida navbatdagi soʻrovnomani tashkil etdi. Ahamiyatlisi shundaki, keyingi paytdagi har qanday tanlov va soʻrovnomalarda Husanovning reytingi yuqoriga qarab "uchmoqda".

LE11HDF.FR sayti: Saytimiz mavsum davomida siz muxlislarni “Lans”ning har oydagi eng yaxshi oʻyinchisini aniqlashga chaqirib keladi.

Abduqodir Husanov deyarli har hafta yakuniga koʻra, hayratlangan muxlislarning maqtovlarini eshitishiga toʻgʻri kelyapti. Shu bois, bu futbolchi “Lans”da oyning eng yaxshi oʻyinchisi boʻlishi odat tusiga kirib qoldi.

Qishki transferlar oynasi davrida jamoani tark etishi ehtimoli katta boʻlgan 20 yoshli himoyachi dekabr oyini ham yuqori saviyada oʻtkazdi. “Lans” oy davomida “Monpele”, “Oser” yoki “Pari Sen-Jermen” boʻladimi, bu raqiblarga qarshi bellashuvlarda muxlislar Husanovni uchrashuvning eng yaxshi oʻyinchisi, deb topdi.

Uchrashuvlardagi kurashuvchanlik, tezkorlik, himoya chizigʻini nazorat qilish, toʻpga egalik qilish qobiliyati “Lans” uchun muhim ahamiyat kasb etmoqda va Abduqodirni saytimiz oʻquvchilari tomonidan dekabr oyining eng yaxshi futbolchisi sifatida e'tirof etilishiga asos boʻldi.

Soʻrovnoma natijalari bilan tanishing:
- Abduqodir Husanov – 78 foiz
- Pshemislav Frankovski – 16 foiz
- M'Bala Nzola – 3 foiz.

Ta'kidlash joizki, Abduqodir Husanovning muayyan oy davomida jamoaning eng yaxshi oʻyinchisi boʻlishi yaxshi a'nanaga aylanib boʻlgan. Muxlislar uning xizmatlarini e'tirof etmoqda.

Mavsumning birinchi qismi olti oy davom etgan boʻlsa, ularning teng yarmida lanslik ishqibozlar aynan oʻzbek legioneriga eng koʻp ovoz berib kelgan.

LE11HDF.FR sayti soʻrovnomasining avvalgi oylardagi eng yaxshi futbolchilari roʻyxati quyidagicha koʻrinish oldi:
- Avgust: Kevin Danso
- Sentyabr: Abduqodir Husanov.
- Oktyabr: Abduqodir Husanov.
- Noyabr: Adriyen Tomasson
- Dekabr: Abduqodir Husanov.

Abduqodir Husanov joriy mavsumda Frantsiya chempionati, mamlakat kubogi va Evropa Ligasida jami 16 ta uchrashuvda ishtirok etib, himoyadagi vazifalarini bajarishdan tashqari, bitta assist ham qayd etdi. 20 yoshli futbolchi Transfermarkt portali tomonidan 12 million evroga baholanmoqda va bu koʻrsatkich boʻyicha Markaziy Osiyoning eng qimmatbaho oʻyinchisi hisoblanadi. “Zamin” yangiliklarini “Telegram”da kuzatib boring