Eldor Shomurodov yakshanba kuni boshqa klubga oʻtishi kutilmoqda

“Roma” qishki transferlar vaqtida tarkibda jiddiy oʻzgarishlar qilmoqda. Rimliklar hozircha ikki nafar yangi oʻyinchi – tajribali darvozabon Perluiji Gollini va yosh himoyachi Devayn Renshni olganini rasman e'lon qildi.

Gollini “Atalanta”dan 800 ming yevroga olingan boʻlsa, “boʻrilar” oʻng qanot himoyachisi Rensh uchun “Ayaks” hisobiga 5 million yevro oʻtkazib berdi.

“Roma”ning asosiy maqsadi markaziy hujumchi olish boʻlib qolmoqda. Buning uchun Eldor Shomurodov oʻz oʻrnini boʻshatib berishi talab etiladi. Bosh murabbiy Klaudio Raneri Evropa Ligasi doirasida “AZ Alkmaar”ga qarshi oʻtgan bahsda oʻzbek futbolchisi xizmatidan foydalanmaganidan keyin Eldor Shomurodov Rimni tark etishi haqidagi gap-soʻzlar koʻpayib ketdi.

Italiya matbuotining yozishicha, 29 yoshli hujumchi uchun kurashda favoritlar bir necha marotaba oʻzgardi. Ayni paytda oʻzbek legioneriga “Kalyari”, “Empoli” hamda “Venetsiya”dan jiddiy qiziqish boʻlib turibdi.

Bu jamoalar orasida “Venetsiya”ning imkoniyati yuqori baholanmoqda.

- “Venetsiya” oʻz hujum chizigʻida katta oʻzgarishlar qilishga bel bogʻlagan. Jamoa toʻpurari Joel Poxyanpalo “Palermo”ga koʻchib oʻtishga yaqin. Eusebio Di Franchesko bosh murabbiylik qilayotgan jamoa transferlar boʻyicha aloqalarini faollashtirdi.

Jamoa koʻz tikkan forvardlar orasida Eldor Shomurodov favorit. Keyingi oʻrinda Andrea Belotti turibdi. Yana bir nomzod – ilgari “Milan”da oʻynagan va hozir “Leyptsig” a'zosi hisoblangan Andre Silvani olish venetsiyaliklarga etarli darajada ogʻirlik qilmoqda. Chunki unga Italiya, Germaniya va Angliyaning boshqa klublaridan takliflar bor, - deb yozdi Corriere dello Sport gazetasi.

Taniqli insayder Janluka Di Martsio oʻzining gianlucadimarzio.com saytida bu ma'lumotlarni tasdiqladi.

- “Venetsiya” bosh murabbiyi Eusebio Di Franchesko aynan Eldor Shomurodov nomzodida toʻxtaldi. Venetsiyaliklar “Roma”ning 14-raqamli hujumchisi transferini yakshanba kuni – 26 yanvarda yakunlaydi.

Garchi oʻzbek hujumchisiga “Empoli” ham qiziqayotgan boʻlsa-da, u faoliyatini “Venetsiya”da davom ettirish imkoniga ega. “Venetsiya” Eldorning yakuniy tasdigʻini kutyapti. Ular “Roma” bilan futbolchini keyinchalik sotib olish majburiyati bilan yarim yilga ijaraga olishga kelishgan, - deb ma'lumot berdi Janluka Di Martsio.

Demak, manbalar tarqatayotgan ma'lumotlarga qaraganda, transferning amalga oshishi Eldor Shomurodovning qaroriga bogʻliq boʻlib turibdi. Qishki transferlar oynasi yopilishiga bir necha kun vaqt qoldi. Tez orada Italiyadagi legionerimiz faoliyatini qaysi klubda davom ettirishi aniq boʻladi. “Zamin” yangiliklarini “Telegram”da kuzatib boring