Olariu muxlislarni BAA – O‘zbekiston uchrashiuviga chorladi

Jahon chempionati 3-saralash bosqichi doirasidagi hal qiluvchi bahslar arafasida Birlashgan Arab Amirliklari terma jamoasi bosh murabbiyi Kosmin Olariu muxlislarga murojaat bilan chiqdi. 5 iyun kuni bo‘lib o‘tadigan BAA – O‘zbekiston bellashuvi oldidan rumin mutaxassis yurtdoshlarini milliy jamoaga kuchli qo‘llab-quvvatlash bilan yordam berishga chaqirdi.

"Amirliklar uchun juda muhim kun yaqinlashmoqda. Bu nafaqat futbol, balki milliy g‘urur va yurt sharafini himoya qilish kechasidir. Barchangizni stadionga taklif qilaman — kelinglar, jamoamizni qo‘llab-quvvatlaylik! Inshaalloh, bu hal qiluvchi o‘yinda g‘alabaga erishamiz", — dedi 55 yoshli murabbiy mahalliy OAV orqali.

Mazkur o‘yin BAA terma jamoasi uchun jahon chempionati yo‘lidagi muhim sinovlardan biri sanaladi. Raqib — oxirgi yillarda katta salohiyat va barqaror o‘yini bilan tanilayotgan O‘zbekiston terma jamoasi. Ikki jamoa o‘rtasidagi to‘qnashuv nafaqat Osiyodagi kuchlar nisbatini belgilab beradi, balki guruhdan chiqish masalasiga ham ta’sir ko‘rsatadi.

BAA futbol jamoatchiligi va muxlislar orasida katta qiziqish uyg‘otgan ushbu uchrashuvda tribunalardagi muhit muhim rol o‘ynaydi. Kosmin Olariuning fikricha, muxlislar nafaqat jamoani ruhlantirishi, balki o‘yin taqdiriga ta’sir qilish salohiyatiga ham ega.

Eslatib o‘tamiz, BAA – O‘zbekiston uchrashuvi 5 iyun kuni bo‘lib o‘tadi. Har ikki jamoa uchun ham bu bellashuv hal qiluvchi ahamiyat kasb etadi. Kim kuchli — ushbu murakkab raqobatda maydon ko‘rsatadi. “Zamin”ni Telegramʻda oʻqing!