O‘zbekiston o‘smir boksida yonadi: 7 nafar chempion, 7 ta oltin!

10–14-iyun kunlari Qirg‘izistonning Cho‘lpon-Ota shahrida bo‘lib o‘tgan IX xalqaro "Qirg‘iziston gavhari" sport o‘yinlarida O‘zbekiston o‘smirlar terma jamoasi katta muvaffaqiyatga erishdi. Xususan, mazkur musobaqadagi boks bellashuvlarida yurtimiz sharafini himoya qilgan 7 nafar yosh bokschi barcha raqiblarini mag‘lub etib, musobaqani 100 foizlik natija bilan yakunlashdi.

Baxtiyorjon To‘raboyev boshchiligidagi jamoa to‘liq tarkibda oltin medallarga ega chiqdi va O‘zbekiston boks maktabi yana bir bor Markaziy Osiyo sahnasida o‘z so‘zini ayta oladigan salohiyatga ega ekanini namoyon etdi.

G‘oliblarimiz shulardan iborat:
-42 kg: Abduvoris Rahimjonov
-44 kg: Kamronbek Bahodirov
-46 kg: Javlonbek Mahamadisaqov
-54 kg: Asadbek Esonboyev
-60 kg: Ibrohim Shokirjonov
-80 kg: Jahongir To‘ychiboyev
+80 kg: Asadbek Sultonboyev

Bu yutuq faqatgina yakka muvaffaqiyat emas, balki o‘rta yoshdagi sportchilarimizga berilayotgan e’tibor, tizimli tayyorgarlik va yuksak ruhiy holatning natijasi sifatida baholanmoqda. Murabbiy Baxtiyorjon To‘raboyevning shogirdlari nafaqat jismoniy tayyorgarlik, balki texnika va taktika borasida ham yuqori darajada ekanini namoyon etishdi.

Yangi avlod — yangi umidlar
Xalqaro turnirda bunday yuqori ko‘rsatkich qayd etilishi, avvalo, yoshlar sportiga qaratilayotgan ustuvor e’tibor va investitsiyalarning samarasi. Bugungi chempionlar — ertangi kunning professional boks yulduzlari sifatida ko‘rilmoqda.

Zamin.uz tahririyati o‘smirlarimizga kelgusida ham faqat g‘alabalar, yangi yutuqlar va yorqin sport yo‘li tilab qoladi.