“Manchester Siti” jamoasida yangi mavsum oldidan katta yangilik: portugaliyalik mahoratli yarim himoyachi Bernardu Silva jamoa sardori etib tayinlandi. Bu haqda jamoa ustozi Pep Gvardiola shaxsan ma’lum qildi.
Gvardiolaning ta’kidlashicha, bu — uning murabbiylik faoliyatidagi ilk holat bo‘lib, u jamoa sardorini shaxsan o‘zi tanlagan. "O‘tgan mavsumdagi sardorlik borasidagi ba’zi voqealar menga yoqmadi. Shuning uchun bu gal jamoa nomidan qarorni o‘z qo‘limga oldim", — deydi Pep.
Uning aytishicha, Bernardu nafaqat maydonda, balki maydondan tashqarida ham o‘ziga xos yetakchilik xususiyatlariga ega. U doim jamoa manfaatini birinchi o‘ringa qo‘yadigan futbolchi sifatida tanilgan. “Qiyin pallalarda o‘zini ko‘rsatishga tayyor bo‘lgan, sog‘lom ruhdagi sardor kerak edi — va men bunday insonni Bernarduda ko‘rdim”, – dedi murabbiy.
Gvardiola shuningdek, jamoada yana to‘rt nafar tajribali yetakchi borligini ta’kidladi: Ruben Diash, Rodri, Ilkay Gundogan va Bernardu Silva. Shu bilan birga, u yosh to‘purar Erling Xoland haqida ham to‘xtalib, uning kelajakda jamoa yetakchisiga aylanishini istashini bildirdi. “Xoland sardorlik mas’uliyatini tushunib yetayotgan yosh futbolchi. Agar u jamoada qolsa, bu lavozimga tabiiy nomzod bo‘ladi”, — deya ishonch bildirdi Gvardiola.
Shuningdek, murabbiy klublar o‘rtasidagi jahon chempionatidan so‘ng yana 1-2 nafar sardorni qo‘shishini ham ma’lum qildi. “Sardorlar doim jamoa uchun eng to‘g‘ri qarorni tanlashlari kerak. Ular xato qilmasliklari kerak, chunki jamoa ularga ishonadi”, — dedi u.
Bernardu Silva “Manchester Siti”dagi faoliyati davomida o‘zining barqaror o‘yini, mehnatsevarligi va sadoqati bilan ko‘pchilikning e’tiborini qozongan. Uning sardorlikka tayinlanishi nafaqat uning shaxsiy yutug‘i, balki jamoa ichki muhitining barqarorligiga ham ishora qiladi.
Shubhasiz, “Siti” muxlislari yangi sardor ostidagi jamoadan yanada muvaffaqiyatli mavsum kutishmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
