Abduqodir Husanovni “Manchester Siti” bilan yangi mavsumda nimalar kutyapti?

O‘zbekiston milliy terma jamoasining markaziy himoyachisi Abduqodir Husanov Yevropaning eng kuchli klublaridan biri “Manchester Siti”da faoliyat yuritmoqda. Aynan shu sababli, o‘zbek futbol ishqibozlari va sport muhlislari ushbu klub atrofidagi har bir yangilik va voqealarni diqqat bilan kuzatib borishyapti.

Kuchli grand klublarda har bir futbolchiga munosib o‘rinbosar qidirish, jamoaning strategik rejalarini aniqlash va katta o‘zgarishlarga tayyorgarlik ko‘rish odatiy holat. Katta maqsadlarni ko‘zlagan “Manchester Siti”da ham aynan shunday jarayon ketmoqda. Xosep Gvardiola boshchiligidagi jamoa Yevropa va dunyo futbolida yetakchilikni yo‘qotmaslik uchun yangi qadamlar tashlamoqda. Gvardiolaning amaldagi shartnomasi 2027 yilning yoziga qadar amal qiladi, biroq natijalar yomonlashsa, uning klub bilan xayrlashishi ancha erta sodir bo‘lishi mumkin.

Bu mavsumning boshidanoq jamoada jiddiy o‘zgarishlar boshlandi. Jamoa tarkibi to‘liq yangilandi, yangi qo‘shilgan futbolchilar safida Abduqodir Husanovning kelishi eng katta yangiliklardan biri bo‘ldi. Ushbu transfer “shaharliklar” uchun strategik ahamiyatga ega bo‘ldi, chunki klub himoya chizig‘ida ishonchli va iqtidorli o‘yinchiga ehtiyoj sezardi.

Yevropaning ko‘plab futbol nashrlari ta’kidlaganidek, klub rahbariyati hozirdan Gvardiolaning o‘rniga yangi mutaxassis nomini ham tanlab qo‘ygan. Yaqin kelajakda “Manchester Siti”ni yana bir ispaniyalik ustoz, “Komo” klubini boshqarib kelayotgan Sesk Fabregas boshqarishi mumkin. Jamoa rahbarlari Fabregasning liderlik salohiyati, futbolchilar bilan til topishish qobiliyati va murakkab vaziyatlarda sovuqqonlik bilan to‘g‘ri qaror qabul qilishini yuksak baholayapti. Angliya Premer-ligasida o‘ynagan tajribasi va ingliz futbolini yaxshi bilishi tufayli Fabregas yangi loyihalar uchun ideal nomzod sifatida ko‘rilmoqda.

Endilikda eng qiziqarli savol: yangi ustoz Abduqodir Husanovga imkoniyat beradimi? Mutaxassislar fikricha, himoyachi o‘z salohiyati va o‘yinlari bilan rahbariyat ishonchini oqlayapti. Uning shartnomasi 2029 yilning yarmigacha tuzilgan va klub kelajakda ham uni asosiy tarkibda ko‘rishni rejalashtirmoqda.

Angliya Premer-ligasi “Manchester Siti”ga nisbatan qo‘yilgan qoidalarni buzgani uchun 1,08 million funt miqdorida jarima tayinladi. Jamoa 2024–2025 yilgi mavsumda uchrashuvlarni o‘z vaqtida boshlamagani va ba’zi o‘yinlarda kechikishlar kuzatilgani sababli jazolandi. Bu holat chempionatning reglament talablariga jiddiy munosabatda bo‘lish zarurligini yana bir bor isbotladi.

Jamoa sardorlari Kayl Uoker va Kevin de Bryuyne ketganidan so‘ng, Gvardiola Bernardu Silvaga sardorlik vazifasini topshirdi. Silva bir qator boshqa variantlar bo‘lishiga qaramay, “Manchester Siti”da qolishga qaror qildi va yangi mavsumda jamoani yetaklashga tayyor ekanini bildirdi.

Yana bir muhim yangilik: yangi mavsum APLda “Manchester Siti” safarda “Vulverxempton”ga qarshi o‘yin bilan start oladi. Bu uchrashuvda Abduqodir Husanovning imkoniyatlari yana bir bor sinovdan o‘tadi.

Ta’kidlash kerakki, o‘tgan mavsumda chempionatning birinchi yarmida kutilgan natijalar olinmagan edi. Biroq qishki transferlar davrida tarkibga Husanov, Umar Marmush, Niko Gonsales va Vitor Reys qo‘shilishi bilan jamoa sezilarli o‘zgardi va oxir-oqibat, “Manchester Siti” chempionatni uchinchi o‘rinda yakunlab, Yevropa Chempionlar ligasi yo‘llanmasini qo‘lga kiritdi. “Zamin”ni Telegramʻda oʻqing!