Saudiya Arabistonida faoliyat yurituvchi mashhur jurnalist Abdulaziz Al-Oseymining xabar berishicha, Portugaliya terma jamoasi sardori Krishtianu Ronaldu endi “An-Nasr” klubining 20 foiz aksiyasiga egalik qilmoqda. Uning so‘zlariga qaraganda, bu kelishuv klubning yaqinda amalga oshirilgan ichki o‘zgarishlari natijasida rasmiylashgan.
Mazkur yangilik mamlakat ommaviy axborot vositalari tomonidan qizg‘in muhokamalarga sabab bo‘ldi. Turli sport nashrlari tomonidan “Ronaldu — endi nafaqat jamoa yulduzi, balki mulkdor” kabi so‘zlar bilan bezatilgan sarlavhalarda maqolalar chop etildi. Bu esa futbol yulduzining klubdagi nufuzi yanada oshib borishini ko‘rsatadi.
Aslida, 2024 yilning iyun oyida “An-Nasr” klubi Ronaldu bilan yangi shartnoma imzolaganini ma’lum qilgandi. O‘shandagi kelishuvga ko‘ra, portugaliyalik futbolchiga klub aksiyalarining 15 foiz ulushi berilgani ma’lum qilingan edi. Endi esa bu ko‘rsatkich yanada oshgani aytilmoqda.
Qayd etish joizki, 40 yoshga kirganiga qaramay, Krishtianu Ronaldu joriy 2024/2025 yilgi mavsumda o‘zini yuqori sport formasida ushlab turibdi. U mavsum davomida jami 41 ta rasmiy bellashuvda ishtirok etib, 35 marotaba raqib darvozalarini ishg‘ol qilgan. Shuningdek, to‘rtta aniq golli uzatma bilan jamoasining muvaffaqiyatiga hissa qo‘shgan.
Ronalduning bozordagi transfer qiymati esa 12 million yevroga teng bo‘lib, bu uning futbolchilik faoliyatini hamon yuqori darajada davom ettirayotganini ko‘rsatadi. U nafaqat maydondagi yetakchi, balki jamoaning moliyaviy va strategik taraqqiyotida ham asosiy shaxsga aylanib bormoqda.
Muxlislar esa Ronalduning bu yangi rolini qiziqish bilan kuzatishmoqda. Endi u jamoa uchun nafaqat to‘purar, balki klub istiqbolini belgilaydigan mulkdorlardan biri sifatida ham mas’uliyatni o‘z zimmasiga olgan. “An-Nasr” klubi tarixida yangi sahifa ochilayotgani shubhasiz.
