CAFA musobaqasiga yirik start: O‘zbekiston bugun maydonga tushadi

Bugun yurtimizda Markaziy Osiyo futbolining eng nufuzli musobaqalaridan biri — CAFA Nations Cup-2025 rasman boshlanmoqda. Barcha yuqori kayfiyatda, stadionlarda muxlislar intiqlik bilan kutgan bahslarga tayyorgarlik ko‘rilmoqda.

Kunning ilk uchrashuvi Toshkentdagi “Jar” maydonida bo‘lib o‘tadi. Unda Qirg‘iz Respublikasi terma jamoasi Turkmaniston bilan to‘qnash keladi. Qiziqarli bahs soat 17:00 da start oladi. Har ikki jamoa ham turnirni g‘alaba bilan boshlash niyatida, shuning uchun kurash shiddatli kechishi kutilmoqda.

Kechgi dasturda esa barchaning diqqati yangi qurilgan “Olimpiya” arenasiga qaratiladi. O‘zbekiston milliy terma jamoasi soat 19:30 da maydonga chiqib, O‘mon termasiga qarshi bahs olib boradi. Bu o‘yin mamlakatimiz muxlislari uchun alohida ahamiyatga ega, chunki terma jamoamiz musobaqani yuqori ruhda boshlashni maqsad qilgan.

Muttaxassislar ta’kidlashicha, CAFA turniri nafaqat mintaqaviy kuch sinovi, balki kelgusi Osiyo kubogi va Jahon chempionati yo‘lidagi muhim bosqich sifatida ham katta ahamiyatga ega bo‘ladi. Muxlislar esa bugungi bahslarda terma jamoalar qanday o‘yin namoyish etishini katta qiziqish bilan kutmoqda.