Gvardiola "Siti" g‘alabasidan so‘ng "yangilar" o‘yiniga qanday baho berdi?

Angliya Premer-ligasining 23-turida “Manchester Siti” o‘z maydonida “Vulverxempton”ni 2:0 hisobida mag‘lub etdi va so‘nggi paytlardagi omadsizliklar zanjiriga nuqta qo‘ydi. Uchrashuv yakunlanganidan so‘ng “shaharliklar” bosh murabbiyi Pep Gvardiola mazkur g‘alaba va jamoadagi ayrim futbolchilarning o‘yini haqida fikrlarini ochiq aytdi.

Ispaniyalik mutaxassis avvalambor raqibning kayfiyati va formacini alohida ta’kidladi. Uning so‘zlariga ko‘ra, “Vulverxempton” so‘nggi 4-5 uchrashuvdan beri mag‘lubiyat ta’mini totmay kelayotgan, shunday jamoaga qarshi o‘yinda “Siti” uchun eng muhimi — o‘zini qayta tiklab olish va salbiy seriyaga chek qo‘yish edi.

“Oxirgi 4-5 o‘yindan beri mag‘lubiyat nimaligini bilmay kelayotgan jamoaga qarshi bahsda bizga albatta natija kerak edi. Shu sabab bu g‘alaba juda muhim. Men umumiy natijadan qoniqdim”, — mazmunda fikr bildirdi Gvardiola.

Gvardiola, shuningdek, uchrashuvda o‘yini bilan ajralib turgan ayrim futbolchilarni ham alohida tilga oldi. Xususan, Omar Marmushning harakatchanligi, maydondagi yuqori energiyasi hamda hujumdagi faolligi murabbiyning ko‘nglidan joy olgan. Mutaxassisning ta’kidlashicha, bunday “jonli” harakatlar jamoaga tezlik va yangi nafas beradi.

Debyut uchrashuvini o‘tkazgan Mark Gehi haqida ham ijobiy fikrlar aytildi. Gvardiolaga ko‘ra, Gehi “Kristal Pelas”da sardorlik qilgan futbolchi sifatida katta mas’uliyatni his qiladigan, maydonda yetakchilik qilishni biladigan o‘yinchi. Murabbiy bu sifatlarning yangi jamoada ham tez ko‘rinayotganidan mamnun ekanini yashirmadi.

“Kristal Pelas”da sardor bo‘lish uchun alohida iqtidor kerak. Gehi o‘zini juda yaxshi ko‘rsatdi, men undan mamnunman”, — degan mazmunda bayonot berdi u.

Shuningdek, Gvardiola Mark Gehi va Antuan Semenoni “o‘yinni tez his qiladigan, vaziyatni tez tushunadigan ajoyib futbolchilar” sifatida ta’riflab o‘tdi. Bu esa “Siti”ning kelgusi turlardagi o‘yiniga ham ijobiy ta’sir ko‘rsatishi mumkin.

Qisqasi, “shaharliklar” “Vulverxempton” ustidan qozonilgan g‘alaba orqali nafaqat uch ochkoni, balki ishonchni ham qaytarib oldi. Endi esa Gvardiola jamoasi bu ruhiy ko‘tarinkilikni keyingi uchrashuvlarda ham davom ettirishga harakat qiladi.