Elit Osiyo Chempionlar ligasining navbatdagi turida Qarshining “Nasaf” jamoasi Iroqning “Al-Shorta” klubiga qarshi maydonga tushdi. Uchrashuvdan keyingi matbuot anjumanida “ajdarlar” bosh murabbiyi Ro‘ziqul Berdiyev va bahsning “Eng yaxshi futbolchisi” deb topilgan Murodbek Rahmatov ishtirok etib, o‘yin taassurotlari bilan o‘rtoqlashdi.
Berdiyev: raqibda o‘yin amaliyoti sezildi
Ro‘ziqul Berdiyevning ta’kidlashicha, bugungi bellashuv shu narsani yaqqol ko‘rsatdiki, raqib jamoada musobaqa “ritmi” bor. Sababi oddiy: Iroqda milliy chempionat davom etyapti, bizda esa rasmiy mavsum hali endi-endi qo‘zg‘alish arafasida.
Ustozning fikricha, ana shu farq natijaga ham ta’sir qildi. Shunga qaramay, “Nasaf” gol urgandan keyin ham bir necha yaxshi imkoniyatlarga ega bo‘lgan.
“Goldan keyin ham vaziyatlar bo‘ldi. Agar o‘sha shanslardan foydalanganimizda, g‘alabani ushlab qolishimiz mumkin edi. Rostini aytsak, raqib ham juda yaxshi harakat qildi”, — deya o‘z xulosasini bildirdi Berdiyev.
Rahmatov: g‘alaba uchun tushdik, ammo durang bo‘ldi
Uchrashuvning eng faol o‘yinchilaridan biri bo‘lgan, “eng yaxshi futbolchi” sifatida e’tirof etilgan Murodbek Rahmatov ham raqibning kuchini tan oldi.
“Bugun kuchli jamoaga qarshi o‘ynadik. Bellashuv og‘ir kechdi. G‘alaba maqsadida maydonga tushgandik, ammo durang qayd etdik. Nasib qilsa, keyingi bahslarda yutamiz va muxlislarni xursand qilamiz”, — dedi u.
Nega g‘alaba qo‘ldan chiqdi?
Matbuot anjumanida Berdiyevga “Nasaf” Elit OCHLda ilk g‘alabasini olib qo‘yishi mumkin edi, ammo nega yutuqni saqlab qololmadi?” degan savol ham berildi.
Murabbiy buni bir necha omil bilan izohladi. Ayniqsa, ikkinchi bo‘limda jamoa o‘zini to‘liq namoyon qila olmagani, o‘yinning ma’lum qismida himoyaviy harakatlarga “qamalib” qolingani aytib o‘tildi. Raqib gol urgandan keyin ham “Nasaf”ning hujumdagi xavfi kamaygan.
“Ikkinchi taymda unchalik o‘z o‘yinimizni chiqara olmadik, vaziyatlar ham kam bo‘ldi. Ko‘proq himoya bilan band bo‘lib qoldik. Hammasini to‘liq ko‘rib chiqib, xatolarni tahlil qilamiz”, — dedi Berdiyev.
Farg‘onaga katta rahmat
E’tiborli jihat — bahs Farg‘onadagi stadionda o‘tdi va Berdiyev bu masalaga alohida to‘xtalib o‘tdi. U, avvalo, viloyat hokimi Xayrullo Bozorovga minnatdorchilik bildirdi, shuningdek, farg‘onalik muxlislarning qo‘llab-quvvatlashiga yuqori baho berdi.
“Buning uchun viloyat hokimi Xayrullo Bozorovga alohida rahmat aytamiz. Farg‘onalik muxlislarga ham katta minnatdorchilik. Ular bizga ajoyib tarzda dalda bo‘lishdi”, — deya yakunladi “Nasaf” ustozi.
Xulosa shu: durang — ko‘ngildagidek emas, lekin mavsum endi boshlanyapti. Eng muhim plyus — jamoa hali “ishchi holat”ni yig‘yapti, muxlis esa bor ekan, demak, “Nasaf”ning ruhi ham bor. Endi navbat — shu ruhni g‘alabaga aylantirishda.
“Zamin”ni Telegramʻda oʻqing!
