Ozarbayjon poytaxti Boku shahrida sport gimnastikasi bo'yicha nufuzli Jahon kubogi bahslari qizg'in davom etmoqda. Musobaqaning dastlabki saralash bosqichlari ortda qoldi va unda tajribali gimnastikachimiz Oksana Chusovitina o'z mahoratini namoyish etdi. Sportchimiz tayanib sakrash dasturida muvaffaqiyatli ishtirok etib, final bosqichiga yo'llanmani qo'lga kiritdi.
Saralash bahslarida hakamlar Oksana Chusovitina chiqishini 13.049 ball bilan baholashdi. Ushbu natija unga umumiy jadvalda uchinchi o'rinni egallash va finalga chiqish imkonini berdi. Mazkur yo'nalishdagi hal qiluvchi bellashuvlar 7 mart kuniga belgilangan. Shuningdek, sportchimiz bugun to'sinda mashq bajarish dasturida ham o'z omadini sinab ko'radi.
Erkaklar o'rtasidagi bahslarda esa vakillarimiz uchun musobaqa biroz qiyin kechdi. Abdulaziz Mirvaliyev va Humoyun Ismoilov erkin mashq dasturida, Rasuljon Abdurahimov esa parallel brusda o'z chiqishlarini namoyish etishdi. Afsuski, ularning to'plagan ballari final bosqichiga chiqish uchun yetarli bo'lmadi. Milliy olimpiya qo'mitasi ma'lumotiga ko'ra, gimnastikachilarimiz kelgusi musobaqalarda yanada yaxshiroq natija qayd etish uchun tayyorgarlikni davom ettirishadi.
“Zamin”ni Telegramʻda oʻqing!
