Germaniya Bundesligasining 26-turidan o‘rin olgan markaziy bahslardan biri «Bayer» va «Bavariya» jamoalari o‘rtasida bo‘lib o‘tdi. Qiziqarli va keskin kurashlarga boy kechgan ushbu uchrashuv yakunida tomonlar 1:1 hisobida durangga imzo chekishdi.
Turnir jadvalida peshqadamlikni saqlab turgan «Bavariya» (67 ochko, 1-o‘rin) mehmon sifatida maydonga tushdi. «Bayer» esa 45 ochko bilan 6-pog‘onada joylashgan holda raqibini qabul qildi. Bahsning ilk daqiqalaridanoq maydonda shiddatli o‘yin kuzatildi.
Hisob 6-daqiqada ochildi. Maydon egalari safida Garsiya aniq zarba bilan to‘pni darvoza to‘riga joylab, jamoasini oldinga olib chiqdi. Birinchi bo‘limda mehmonlar uchun yana bir noxush holat yuz berdi — Jekson 42-daqiqada qoidabuzarlik sabab maydondan chetlatildi va «Bavariya» bir kishi kam bo‘lib qoldi.
Shunga qaramay, myunxenliklar ikkinchi bo‘limda kurashni davom ettirdi. 69-daqiqada Luis Dias hisobni tenglashtirib, jamoasiga muhim golni taqdim etdi. Biroq uchrashuvning so‘nggi qismida mehmonlar yana bir zarba qabul qildi — Dias 84-daqiqada ikkinchi sariq kartochkadan keyin maydonni tark etdi. Shu tariqa «Bavariya» o‘yinni 9 nafar futbolchi bilan yakunlashga majbur bo‘ldi.
Shunga qaramay, Vensan Kompani boshchiligidagi jamoa hisobni saqlab qolishga muvaffaq bo‘ldi va safardan muhim bir ochko bilan qaytdi. Bu natija turnir jadvalidagi kurashni yanada qiziqarli qilishi kutilmoqda.
Bundesliga. 26-tur
Bayer — Bavariya 1:1
Gollar: Garsiya 6 — Luis Dias 69.
"Bayer": Blasvih, Kuansa, Andrih, Tapsoba, Kulbrayt (Hofman, 79), Fernandes, Garsiya (Palasios, 77), Pok-u (Tella, 87), Terriyer (Maza, 46), Tilman, Shik (Kofane, 61).
"Bavariya": Ulrayx, Stanishich, Upamekano, Ta, Laymer, Kimmix, Pavlovich (Goretska, 61), Olise (Bishof, 89), Karl (Keyn, 61), Luis Dias, Jekson.
Chetlatish: Jekson 42, Luis Dias 84.
“Zamin”ni Telegramʻda oʻqing!
