Mo‘g‘ulistonning Ulan-Bator shahrida o‘tkazilayotgan boks bo‘yicha Osiyo chempionati qizg‘in pallaga kirdi. Chorak final bahslari doirasida bugun yurtimiz sharafini himoya qilayotgan 5 nafar sportchimiz ringga ko‘tarilib, muxlislarga unutilmas janglarni taqdim etdi.
-65 kg vazn toifasidagi vakilamiz Feruza Abdualimova shimoliy koreyalik Xe Sun Xvangga qarshi kuch sinashdi. Jang boshidanoq keskin va murosasiz o‘tdi. Afsuski, ikkinchi raundda texnik nokaut qayd etildi va Abdualimova bahsni erta yakunlashga majbur bo‘ldi.
Shu vazndagi yana bir umidli bokschimiz Abdulloh Madaminov Hindiston vakili Pratap Yadavga qarshi ringga chiqdi. Raqib jiddiy qarshilik ko‘rsatishga uringan bo‘lsa-da, Madaminovning faolligi, tezkorligi va bosimi hal qiluvchi omilga aylandi. Natijada u mutlaq ustunlik bilan 5:0 hisobida g‘alaba qozonib, yarim final yo‘llanmasini qo‘lga kiritdi.
-75 kg vazndagi iqtidorli bokschimiz Aziza Zokirova ham o‘z chiqishi bilan muxlislarni xursand qildi. U yaponiyalik Naoko Kasaxaraga qarshi bahsda to‘liq ustunlikni qo‘lga kiritib, raqibasiga deyarli imkoniyat qoldirmadi. Uchinchi raundda texnik nokaut qayd etildi va Zokirova ishonchli tarzda yarim finalga yo‘l oldi.
-60 kg vazn toifasida Abdurahmon Mahmudjonov Iordaniya vakili Muhammad Abuga qarshi jang qildi. Bu bahsni bemalol “master-klass” deb atash mumkin. Vakilimiz ringda har tomonlama ustunlik namoyon etib, 5:0 hisobida ishonchli g‘alabaga erishdi va yarim finalchilar safiga qo‘shildi.
+90 kg vazndagi bokschimiz Arman Maxanov esa juda kuchli raqib — Qozog‘istonlik jahon chempioni Aybek Oralbayga qarshi ringga chiqdi. Maxanov qattiq kurashdi, bor kuchini ishga soldi. Biroq tajriba va daraja o‘z so‘zini aytdi — jang 1:4 hisobida raqib foydasiga yakunlandi.
Qisqasi, bugungi bahslar yurtimiz bokschilari uchun ham sinov, ham imkoniyat kuni bo‘ldi. Uch nafar sportchimiz yarim finalga chiqib, medal uchun kurashni davom ettirmoqda. Endi asosiy savol — ular finalga yo‘l olib, oltin uchun jang qila oladimi? Intriga endi boshlanyapti.
“Zamin”ni Telegramʻda oʻqing!
