Braziliyada davom etayotgan World Boxing kubogi bahslari qizgʻin va murosasiz kurashlar ostida oʻtmoqda. Mazkur nufuzli musobaqada Oʻzbekiston sharafini himoya qilayotgan bokschi qizlarimiz ilk bosqichdanoq oʻzlarining yuksak tayyorgarligi va mahoratini namoyon etmoqda.
-48 kg vazn toifasida yurtimiz nomidan ishtirok etayotgan iqtidorli bokschi Farzona Fozilova ham musobaqadagi birinchi jangini muvaffaqiyatli oʻtkazdi. Ushbu bellashuvda u marokashlik tajribali raqiba Vissal Faxirga qarshi ringga koʻtarildi. Jang davomida Fozilova faollik, aniqlik va taktik ustunlikni namoyon etdi. Barcha raundlar mobaynida ustunlikni qoʻldan bermagan yurtdoshimiz yakunda 4:1 hisobida ishonchli gʻalabaga erishib, musobaqaning keyingi bosqichiga yoʻl oldi.
Shuningdek, -65 kg vazn toifasida yurtimiz sharafini himoya qilayotgan yana bir mahoratli sportchi Navbahor Hamidova ham oʻz ishtirokini gʻalaba bilan boshladi. U ilk bosqichda shveysariyalik Anna Jenniga qarshi ringga chiqdi. Bellashuv davomida Hamidova oʻzining kuchli tayyorgarligi, jismoniy ustunligi va texnikasini namoyon etdi. Kutilganidek, u ham raqibasini 4:1 hisobida magʻlub etib, navbatdagi bosqichga yoʻllanmani qoʻlga kiritdi.
Shu tariqa, Oʻzbekiston terma jamoasi aʼzolari musobaqada ishonchli start olib, keyingi bosqichlarda ham yuqori natijalar qayd etishiga ishonch uygʻotmoqda. Muxlislar esa yurtdoshlarimizdan yanada yorqin gʻalabalar kutmoqda.
Maʼlumot uchun, ushbu natijalar haqida Oʻzbekiston boks federatsiyasi rasmiy manbalari orqali xabar berildi.
“Zamin”ni Telegramʻda oʻqing!
