Myunxenning “Bavariya” klubi bu mavsum Chempionlar ligasida bosh sovrin uchun asosiy da’vogarlardan biri sifatida ko‘rilgan edi. Biroq yarimfinalda Fransiyaning “PSJ” klubiga qarshi ikki uchrashuv yakunlariga ko‘ra 5:6 hisobida mag‘lub bo‘lgan nemis grandi musobaqani tark etishga majbur bo‘ldi.
Uchrashuvdan keyin “Bavariya” bosh murabbiyi Vensan Kompani jamoaning chiqishi, imkoniyatlari va kelajak rejalari haqida fikr bildirdi. Belgiyalik mutaxassisning ta’kidlashicha, u mavsum davomida jamoasi bilan Chempionlar ligasini yutish mumkinligiga chin dildan ishongan.
— Men har doim Chempionlar ligasida g‘olib chiqish imkoniyatini his qilaman. Bu yil ham shu tuyg‘u bor edi. Jamoada xarakter, sifat va katta ishtiyoq mavjud edi. Lekin bu turnir juda murakkab, — dedi Kompani.
Murabbiyning aytishicha, “Bavariya” kabi ulkan klub uchun ham Yevropaning eng nufuzli musobaqasida g‘olib chiqish oson emas. U Chempionlar ligasi tarixi davomida hatto eng kuchli klublar ham har yili zafar qucha olmasligini eslatib o‘tdi.
— “Bavariya” bu turnirda olti marta g‘alaba qozongan. Chempionlar ligasi qariyb 60-70 yildan beri o‘tkazib kelinadi. “Real”dan tashqari, aksariyat top-klublar odatda o‘n yilda bir marta chempion bo‘ladi. Shuning uchun men ortiqcha bosim qilishni istamayman. Bu sovringa erishish naqadar qiyinligini yaxshi tushunaman, — dedi mutaxassis.
Kompani shu bilan birga jamoa bu yil ham finalga chiqish va hatto bosh sovrinni yutish imkoniyatiga ega bo‘lganini ta’kidladi. Uning fikricha, ayrim kichik detallar va vaziyatlar “Bavariya” taqdiriga salbiy ta’sir qilgan.
— Bu yil hammasini yutishimiz mumkin edi. Balki kelasi mavsum omad va vaziyat biz tomonda bo‘lar. Eng muhimi — to‘xtab qolmaslik va yanada kuchliroq qaytish, — dedi belgiyalik murabbiy.
Eslatib o‘tamiz, Chempionlar ligasi finalida Fransiyaning “PSJ” klubi Angliyaning “Arsenal” jamoasiga qarshi maydonga tushadi. Qit’aning bosh futbol bahsi 30 may kuni Vengriya poytaxti Budapesht shahridagi mashhur “Pushkash Arena” stadionida bo‘lib o‘tadi.
“Bavariya” muxlislari esa jamoaning yangi mavsumda yana Yevropa taxti uchun jiddiy kurash olib borishiga ishonmoqda.
“Zamin”ni Telegramʻda oʻqing!
